Molliqaj me kritika të ashpra për buxhetin: 7 vite investime në autostrada, cilat janë përfitimet?

Deputeti i Kuvendit të Kosovës nga Vetëvendosje, Dardan Molliqaj ka kritikuar Qeverinë për vonimin e Projektligjit për ndryshimin dhe plotësimin e Ligjit për Buxhetin e Kosovës për vitin 2017.

Ai në foltoren e Kuvendit theksoi se Vetëvendosje nuk mund ta mbështesë një buxhet që paguan dëme të aferave të mëhershme korruptive dhe paguan fushata të partive politike.

“Ky buxhet po paguan dëme për shkak të aferave korruptive, po paguan fushata të partive politike dhe për këtë arsye ne asnjëherë nuk jemi të gatshëm me mbështet”, tha Molliqaj, raporton Periskopi.

Po ashtu, deputeti kritikoi edhe LDK-në, e cila sa ishte në qeveri potenconte shpesh dhe qartë se buxheti i vitit 2017 do të jetë 2 miliardë euro, ndërsa tash e thotë të kundërtën.

“I njëjti subjekt ka thënë se buxheti i Kosovës ka qenë 2 miliardë euro dhe i njëjti subjekt politik tash thotë se nuk është 2 miliardë euro.”, tha ai.

Molliqaj tha se dëmi i madh i buxhetit është shkaktuar me investimet kapitale.

“Dëmi më i madh është bërë në investimet kapitale. Kemi një dëmtim të potencialit ekonomik në Kosovë. Cilat janë përfitimet për 7 vite investime në autostrada? Cili është impakti ekonomik?”, pyeti Molliqj.

Ai tha se Rruga e Kombit, një investim i madh kapital, nuk përdoret as përafërsisht në kapacitetet e plota.

“Në Rrugën e Kombit, përdoret vetëm 1/3 e kapacitetit të saj. Pra, 2/3 nuk janë duke u shfrytëzu”, tha Molliqaj. /Periskopi/