Mjekja nga Gjakova: U detyrova të dorëhiqem sepse më kërcënoi drejtori

Zana Olloni, mjeke, për dy vjet kishte punuar në QMF në fshatin Cërmjan të Komunës së Gjakovës.

Por, ajo nga gushti ka dhënë dorëheqje nga ky vend i punës, raporton KTV.

Siç thotë ajo, ka qenë e detyruar ta bëjë këtë, pasi është ndier e kërcënuar nga kryeshefi ekzekutiv i QKMF-së, Kujtim Zarari.

Ajo thotë se shkak për kërcënimet që i ka marrë kanë qenë kërkesat e saj për disa intervenime në infrastrukturën e objektit të QMF-së, përfshirë mungesën e ujit.

Madje, Olloni thotë vetëm ajo është diskriminuar, pasi asaj nuk i është mundësuar një orar i përshtatshëm që të mund të ndjekë studimet specialistike për pediatri.

Për këtë ajo kishte bërë ankesë edhe në Inspektoratin e Punës.

Ndonëse nuk ka pranuar të prononcohet, drejtori Kujtim Zarari, i ka mohuar të gjitha këto pretendime, duke thënë që për këtë rast vendosin organet e drejtësisë.

Por, për krejt këtë ngjarje kanë folur në Drejtorinë e Shëndetësisë në Komunën e Gjakovës.

Drejtori Basri Komoni, ka deklaruar se ka marrë shumë ankesa nga eprorët e Ollonit për shkak të mosrespektimit të orarit, pasi, sipas tyre, ajo ka qenë e angazhuar edhe si mësimdhënëse në Shkollën e Mesme të Mjekësisë në Gjakovë.

Por, pavarësisht krejt këtyre shkeljeve që Komoni pretendon që i ka bërë ish-doktoresha, ata nuk kanë ndërmarrë ndonjë masë më të ashpër ndaj saj.

Olloni rastin e kishte denoncuar në Polici, derisa tash me hetimet po merret Prokuroria Themelore në Gjakovë, pasi hetuesit policorë kanë ngritur kallëzim penal ndaj drejtorit të QKMF-së në Gjakovë.