Memli Krasniqi i trajton si pronë qytetarët që e votuan PDK-në: Ata nuk e mbështesin Shpend Ahmetin

Shefi i Grupit Parlamentar të PDK-së, Memli Krasniqi, i është drejtuar shefit të GP të VV, Glauk Konjufca në një emision, duke i thënë se votuesit e PDK-së nuk do ta mbështesin më Shpend Ahmetin për kryetar të Prishtinës.

Edhe pse qytetarët janë të lirë të vendosin se cilin kandidat duan ta votojnë, Krasniqi, duke i konsideruar ata si pronë absolute e PDK-së, tha se votuesit e PDK-së nuk do ta votojnë më Shpend Ahmetin, “pasi që ata janë demonizuar mjaftueshëm nga Lëvizja Vetëvendosje” dhe se ky është vendim i partisë, shkruan Periskopi.

Sipas Krasniqit, PDK-ja e ka mbështetur VV-në në zgjedhjet e vitit 2013, kur Ahmeti kishte shkuar në balotazh me Isa Mustafën, duke e rrëzuar atë nga ulësja e kryetarit të Prishtinës. Madje, në TV Dukagjini, ai tha se PDK kishte marrë vendim politik për ta mbështetur Shpend Ahmetin.

“PDK kishte marrë vendim që ta mbështesë Shpend Ahmetin për ta rrëzuar Isa Mustafën”, tha Krasniqi.

Por, kryetari i PDK-së në atë kohë, Hashim Thaçi, tash President i Kosovës, kishte thënë se për PDK-në nuk ka ndonjë rëndësi të veçantë se kush do t’i fitonte ato zgjedhje.

“Hoxhë Alia, Ali Hoxha”, kishte thënë Thaçi, duke iu përgjigjur pyetjeve të gazetarëve.

Krasniqi është shprehur i bindur se PDK-ja është partia që vendos se cili prej kandidatëve, Ahmeti e Abrashi, do të jetë kryetar i Prishtinës, përkundër se partia e tij ka shënuar tkurrjen më të madhe në këtë komunë. /Periskopi/