Korab Sejdiu ‘godet’ Ramush Haradinajn, pas premtimit se do t’i shtyjë përpara proceset e mëdha

Ai ka folur edhe për pritshmëritë e tij nga qeveria e drejtuar nga Ramush Haradinaj.

Deputeti i pavarur Korab Sejdiu i cili deri pas zgjedhjeve të 11 tetorit ishte pjesë e AKR-së, dha dorëheqje nga ky subjekti pasi kreu i saj bëri koalicion me PAN-in.

“Qëndrimi mbetet ai qe kam pas nga fillimi. Pra në aspektin e përcaktimit politik, mbetem për momentin deputet i pavarur dhe nuk i përkas/bashkohem asnjë subjekti politik”, u shpreh Sejdiu për Express, derisa sqaroi se në këtë mënyrë do të fokusohet si deputet i pavarur.

Ai tha se në këtë mënyrë do të fokusohet qe si deputet i pavarur te ushtroj përgjegjësitë qe ka si deputet.

Sejdiu ka folur edhe për pritshmëritë e qeverisë Harasdinaj për t’i shtyrë përpara proceset e mëdha në vend.

Thotë se udhëheqja aktuale do të jetë e pafuqishme për të përfunduar procese të mëdha.

“Jam deklaruar që nga fillimi që qeveria aktuale ka zgjedhë që me mbështetjen minimale ne parlament të formojë pozitën, pra qeverinë. Me këtë, çka është edhe me keq, ka lënë shumicën shqiptare në opozitë. Prandaj, edhe pse shpresa ime është që çështjet me interes kombëtar të procedohen sa më mire dhe sa me shpejtë, kam drojën qe fatkeqësisht qeveria do të jetë e pafuqishme qe të shtyje përpara proceset e mëdha qe e presin Kosovën”, u shpreh Sejdiu.

Deputeti i AKR-së, Korab Sejdiu, i pakënaqur me faktin se subjekti i tij i ishte bashkuar koalicionit PDK-AAK-NISMA për të qenë pjesë e qeverisjes së ardhshme të vendit, ka dhënë dorëheqje nga partia për të vazhduar si deputet i pavarur i Kuvendit të Kosovës. Arsyeja kryesore për këtë vendim ishte qeveria e pakicës shqiptare, e varur nga Lista Serbe.