Haxhiu: U vërtetua pafajësia e aktivistëve tanë, farsa tani duhet të ndalet këtu

Deputetët e Lëvizjes Vetëvendosje, Albulena Haxhiu dhe Sami Kurteshi kanë dalë para mediave për të folur rreth rastit të aktivistëve të kësaj lëvizjeje dhe akuzave që u janë bërë për terrorizëm.

“Më shumë se një vit më parë u arrestuan gjashtë aktivistë tanë për sulmin ndaj kuvendit, atyre ju mvesh vepra më e rëndë ajo e terrorizimit. Asnjë prej tyre nuk e kreu atë sulm, por tendenca ka qenë të Vetëvendosje të shpallet terroriste”, ka thënë Haxhiu.

Haxhiu thotë se pushteti i asaj kohe nga dëshpërimi që t’i jetësonte dy marrëveshje të dëmshme për shtetin, nisi luftën ndaj Vetëvendosjes.

‘’Aktivistëve tanë iu mvesh vepra më e rëndë që një, pra ajo e terrorizmit. Shteti edhe një herë tregoi se veproi nga ata që e kanë kapur. Një aktivist i yni edhe vdiq, të tjerët u quajtën terroristë e gjithçka tjetër”.

Ajo ka thënë se në shumë mënyra tani është vërtetuar pafajësia e aktivistëve të VV-së.

“Është vërtetuar edhe nga forenzika që të dhënat nuk përputhen me ato të aktivistëve tanë. Si dhe raporti i FBI që thotë se nuk ka asnjë lidhshmëri mes aktivistëve dhe vendngjarjeve”, ka thënë Haxhiu ndër të tjera.

Ajo ka vazhduar të thotë se ky rast ka qenë i montuar ndaj aktivistëve të tyre.

“U desh një vit e gjysmë që edhe prokurori i rastit pranoi se nuk ka prova”.

“Nuk ka asnjë motiv që ky proces të vijojë dhe kjo farsë duhet të ndalet këtu”.

“Kërkojmë liri të plotë për aktivistët tanë dhe kërkojmë drejtësi për aktivistin tonë Astrit Dehari që me 5 nëntor bëhet një vit prej kur ka vdekur”, është shprehur ajo ndër të tjera.