Ganimete Musliu përplaset me deputeten e VV’së

Në seancën e Kuvendit të Kosovës ku po diskutohet për rishikimin e projektligjit për buxhet, Musliu tha se sikur të mos ishin veteranët, sot do të flitej ndryshe në Kuvend.

Më pas ajo foli edhe ‘traumat’ që u përmenden në Kuvend nga deputetët e opozitës, sipas të cilëve PDK ua ka shkaktuar popullit.

“Ata që bëjnë akuza të kursehen për balotazh. Shkoni diku rehabilitoni e largone traumën. Për tri vjet zero rritje pagash në asnjë sektor. E ju që keni trauma për PDK’në, s’kemi çka me ju ba”, tha Musliu.

Asaj i reagoi deputetja e Vetëvendosjes, Fitore Pacolli e cila përmendi disa nga dështimet e qeverisë së kaluar dhe traumat që ajo tha se populli po i pëson shkaku i qeverisjes së PDK’së.

“Po Ganimete, populli është traumatizuar sepse nënat shtatzëna na vdesin në spital. Na vdesin fëmijët sepse u bie fruthi. Na vdesin fëmijët nga leukemia. Në shkolla s’kemi kushte për fëmijët. Kosova një ndër vendet më të korruptuara. 100 mijë qytetarët kërkuan të largohen nga Kosova, për shkak se ju i traumatizuat popullin. Vetëdijesimi i popullit ka filluar. Vota për Vetëvendosjen po rriten”, tha tutje Pacolli.

Më pas asaj iu kundërpërgjigj sërish deputetja Musliu.

“Po Fitore. Gropa e Kolovicës ku iu mbytë nënës fëmija a keni jep përgjegjësi. Fitore meqë jeni të traumatizuar do t’ju blejmë shtëpi në Shëngjin, do t’ju shëtisim me jaht e do t’ju japim cola cola zero. E autobusët i kemi blerë vetë me taksa tona”, tha tutje Musliu.

Sërish u përgjigj deputetja e Vetëvendosjes.

“Po ne i kemi dhënë përgjigje morale asaj nëne. Ju keni fakte për pasurinë marramendëse që e keni. Pasuria juaj është shumëfishuar”, përfundoi Pacolli./Periskopi