Gabimi i madh i KQZ’së, emri i kandidatit të vdekur figuron si fitues i zgjedhjeve në këtë komunë (Foto)

Komisioni Qendror i Zgjedhjeve, në faqen zyrtare ku po publikon të dhëna në kohë reale për ndryshimet e fundit statistikore për zgjedhjet e 22 tetorit, ka bërë një gabim për komunën e Ranilugut, shkruan Periskopi.

Kështu, fituesi absolut i zgjedhjeve në këtë komunë, figuron të jetë Gradimit Nikic i Listës Serbe. Mirëpo ka një gabim të madh këtu.

Kjo, pasiqë kryetari i atëhershëm i Ranillugut, Nikic, ka humbur jetën para pak mujsh në një aksident rrugës për në Nish.

Kandidati i Listës Serbe për Ranilugun në zgjedhjet e 22 tetorit, ka qenë Vladica Aritonovic.

Në fletëvotimin në të cilin kanë pasur mundësi të votojnë qytetarët e Ranilugut, ka qenë emri i Aritonovic, i cili sipas rezultateve të deritashme të KQZ’së, del të jetë fituesi i zgjedhjeve me 77, 62 për qind të votave, shkruan Periskopi.

Nga KQZ, kanë thënë se emri i Mikic figuron ende në tabelën ku po jepen statistikat për komunën e Ranilugut dhe krejt kjo si gabim teknik.

Valmir Elezi, zëdhënës i KQZ’së, i ka thënë Periskopit se fletëvotimi në Ranilug ka qenë në rregull por gabimi teknik në faqen e KQZ’së nuk ka mundur të përmirësohet.

“Është vetëm një gabim teknik që na ka ikur në faqen e KQZ’së por në fletëvotime, normal që ka qenë zëvendësi i tij, pra kandidati i Listës Serbe ashtu siç është e paraparë dhe qytetarët atje kanë pasur mundësi ta votojnë atë kandidat’, ka thënë Elezi për Periskopin.