Avokati kosovar: Do të jem në ballë të paradës së LGBTI-së që do të mbahet në Prishtinë

Avokati Arianit Koci ka bërë të ditur se do të jetë në ballë të paradës së komunitetit LGBTI, që do të mbahet më 10 tetor në Prishtinë.

Koci, këtë ngjarje e ka quajtur “Parada e Krenarisë”, duke thënë se ky komunitet është skajshmërisht i diskriminuar në shoqërinë, shkruan Periskopi.

Ai ka ftuar edhe presidentin, kryeministrin e kryetarin e Kuvendit për të marrë pjesë në paradë.

Ai ka cituar edhe studimin e NDI-së, që Kosovës e rangon si vendin më homofobik në rajon. /Periskopi/

Komenti i plotë i Kocit:

Parada e krenarisë

Në emër të dashurisë është sllogani i Paradës së Krenarisë, i cili do të mbahet të martën e ardhshme ( 10 tetor), në Prishtinë.

Unë do të jem në ballë të kësaj parade, edhe pse nuk i përkas komunitetit LGBTI.

Nuk ka dilemë: ky komunitet është skajshmërisht i diskriminuar në shoqërinë tonë.

Prandaj, ftoj Presidentin, Kryeministrin dhe Kryeparlamentarin e Republikës së Kosovēs që të marrin pjesë në këtë paradë, dhe të ndihmojnë në largimin e paragjykimeve që i ka shoqëria e jonë ndaj këtij komuniteti.

Në studimin e kryer nga National Democratic Institute- NDI “Hulumtimi i mendimit publik për komunitetin LGBTI në Ballkanin Perëndimor”, Kosova rangohet si vendi më homofobik në rajon.