Analisti kërkon shtet modern, kritikon kryetarin e Hanit të Elezit Rufki Suma

Në një opinion për portalin Koha, Agron Demi, kritikon mendësinë me të cilën bëhet politikë në Kosovë. Fushatën e bërë nga partitë politike në Kosovë, ai e quan fushatë odash, ndërsa të njëjtin epitet ia vendos edhe elektoratit [pra, elektorat odash].

Ai kritikon edhe kryetarin e komunës së Hanit të Elezit, Rufki Suma, i cili ia doli të fitonte pa balotazh në zgjedhjet e fundit komunale. Madje, i gjithë titulli i opinionit i dedikohet praktikisht atij: “Sfida e kryetarit për të punësuar djalin e Gafurrit”. Këtu tregohet sesi kryetari aktual i komunës ishte kritikuar nga kundërkandidati [i dënuar për vjedhje votash] se nuk e kishte punësuar çdo anëtar të familjeve të dëshmorëve, duke treguar konkretisht për familjen ‘e Gafurrit’. Por, duket se kryetari aktual i komunës së vogël, kishte dështuar meqë djali i tij e kishte lënë punën. Përmes ofrimit të kësaj storjeje triviale e madje banale, Demi mësyn të tregojë mendësinë qeverisëse e politikbërëse në vendin tonë, e cila nuk përkon me atë që e quajmë shtet modern.

“Shteti modern,” shkruan ai “karakterizohet nga qeverisja jopersonale e joklanore.”

Ai përdor edhe një koncept të filozofit Francis Fukuyama, për të përshkruar shtetin e Kosovës: “neopatrominal”. I tillë është shteti që nga jashtë duket si shtet modern, meqë ka administratë, institucione gjyqësore, organizon zgjedhje, por në realitet ky lloj shteti nuk arrin asnjëherë të largojë personalen dhe klanoren nga qeverisja.

Shkrimi i plotë: http://www.koha.net/veshtrime/54043/sfida-e-kryetarit-per-te-punesuar-djalin-e-gafurrit/