Albin Kurti: Vetëvendosje do të reflektoj

Deputeti më aktiv në fushatën e Vetëvendosjes, Albin Kurti, rezultatin e djeshëm të zgjedhjeve lokale e ka cilësuar si të papritur për Vetëvendosjen, përkundër dyfishimit të rezultatit krahasuar me zgjedhjet e vitit 2013.

Kurti thotë se këto rezultate të VV-së do të trajtohen me vetëkritikë dhe se do të reflektohet mbi strategjitë e veprimit, shkruan Periskopi.

Ai ka uruar edhe gjashtë kandidatët e Vetëvendosjes që tashmë kanë siguruar balotazhin.

Komenti i plotë i Kurtit:

Të nderuar mbështetës e simpatizues, të dashur aktivistë të Lëvizjes.

Rezultati i zgjedhjeve lokale 2017 ishte gati dyfishim i atij të zgjedhjeve lokale katër vite më parë. Më 3 nëntor 2013 hymë në balotazh vetëm në kryeqytet dhe asokohe si të dytët. Me 22 tetor 2017, përveç në kryeqytet ku prin Shpendi, jemi në balotazh edhe në pesë e ndoshta edhe gjashtë komuna të tjera.

Megjithatë, ky rezultat nuk ishte ai që shpresonim dhe as ai që prisnim. Sigurisht kjo duhet trajtuar edhe me vetëkritikë. Këto ditë duhet të jenë edhe ditë analize konkrete sipas komunave dhe ditë reflektimi mbi strategjitë e veprimet: cilat janë dobësitë e organizatës sonë dhe si mund t’i rregullojmë ato; cilat janë mangësitë e ligjërimit tonë dhe si mund t’i plotësojmë ato.

Më lejoni t’i përgëzoj me gjithë zemër Basri Kodrën, Qëndron Kastratin, Ajet Poterën, Sami Kurteshin, Mytaher Haskukën dhe Shpend Ahmetin për balotazhin, e uroj që edhe Besim Muzaqi të mbërrijë në balotazh.

Këto komuna janë gjysma e Kosovës. Të punojmë me gjithë kapacitetin tonë që këto komuna të ecin përpara në rrugën e zhvillimit dhe të bëhen model për gjithë Kosovën.