Aktivisti i Vetëvendosjes sqaron gjithçka: Kështu më sulmuan tre anëtarët e Nismës

Aktivisti dhe kandidati për asamblist në Komunën e Malishevës, Muhamet Bytyqi ka sqaruar sulmin që i ka ndodhur sot nga tre anëtarë të Nismës për Kosovën në këtë komunë.

Ai ka thënë se tre personat e kanë sulmuar në mënyrë tinëzare, derisa po bënte përgatitjet për një tubim që VV ka mbajtur sot në Malishevë.

Bytyqi ka thënë se “askush nuk mund ta ndalë rritjen e Vetëvendosjes” dhe punën e saj kundër krimit e korrupsionit, shkruan Periskopi.

Komenti i plotë i Bytyqit:

Miq, derisa po bënim përgatitjet përfundimtare për tubimin që u mbajt sot në Malishevë, tre persona anëtar të Nismës më kanë dalë në rrugë dhe më kanë sulmuar fizikisht. Fatmirësisht nuk kam pësuar lëndime shumë të rënda. Sulmuesit i kam denoncuar në polici dhe presim që policia dhe drejtësia të bëjnë punën e tyre.

Askush nuk mund ta ndalë rritjen e VETEVENDOSJES!, puna jonë kundër korrupsionit dhe krimit të organizuar, përkushtimi ynë për Republikën na jep forcë që të përballojmë edhe sulme tinëzare si këto.

Përpjekja për një Republikë ku ka drejtësi e zhvillim, një vend ku nuk ka korrupsion, por punë e zhvillim, na ka udhëhequr dhe po na mban në këtë angazhim.

Ragip Begaj duhet të dijë se me dhunë e mashtrime nuk ec më. Ai mbanë përgjegjësi politike, morale dhe ligjore për rastin e sotëm!

I lus të gjithë aktivistët, shokët, shoqet, familjarët që rastin e këtij sulmi t’ua lënë organeve të shtetit e ne të vazhdojmë punën për fitoren e 22 tetorit që do të jetë edhe më e madhe se 11 qershorit!