Mësohet çka i propozuan Veseli dhe Haradinaj ambasadorit Kosnett për taksën

Ambasadori amerikan në Kosovë, Philip Kosnett sot ka takuar kryeparlamentarin Kadri Veseli dhe kryeministrin Ramush Haradinaj. Që prej dy ditësh, kur edhe është paralajmëruar ky takim, nikoqir i të cilit ishte Kadri Veseli, është folur se temë diskutimi do të ishte taksa ndaj Serbisë. Pas takimit, asnjë nga pjesëmarrësit, përfshirë ambasadorin amerikan, Kosnett, kryeparlamentari Veseli e as kryeministri Haradinaj nuk janë deklaruar menjëherë pas takimit, siç vepronin zakonisht pas takimeve të niveleve të tilla.

Kryeparlamentari Veseli, pas një kohe prej takimit, ka shkruar vetëm një status në Facebook, përmes të cilit tregonte se ‘Kosova të gjitha vendimet i merr bashkë me Shtetet e Bashkuara të Amerikës’.

Ndërkaq, kryeministri Haradinaj në një konferencë për media, ka thënë vetëm se ‘jemi të gatshëm dhe kemi qejf ta heqim taksën’, duke aluduar në kushtin e tij të ditur tashmë që kjo do të bëhej ‘me njohje reciproke nga Serbia’. Veseli dhe Haradinaj, nuk kanë dhënë detaje më të hollësishme lidhur me interesimin e mediave se çka konkretisht është diskutuar për taksën në takim me ambasadorin Kosnett.

Por, burime të Periskopit brenda takimit, kanë treguar se kanë qenë Veseli dhe Haradinaj që i kanë propozuar ambasadorit Kosnett se taksa mund të ‘ngrihet’ (pezullohet) përkohësisht, më saktë, në një periudhë kohore prej 3 muajsh.

Por të njëjtat burime thonë se ambasadori Kosnett nuk e ka pranuar këtë ofertë të Veselit dhe Haradinajt, duke kërkuar që taksa të pezullohet tërësisht.

Ndryshe, taksa 100 % ndaj Serbisë, është vendosur në muajin nëntor të vitit 2018.

Që prej atëherë, Kosovës i kanë ardhur shumë thirrje për ta hequr taksën, ndërkaq e fundit ka qenë ajo nga Shtetet e Bashkuara të Amerikës, thirrje të cilën e ka konfirmuar edhe vet kryeministri Ramush Haradinaj.

Ditë më parë, në një deklaratë dhënë mediave, Hardinaj ka konfirmuar se ‘i ka ardhur qëndrimi i SHBA’së për taksën përmes ambasadorit amerikan në Kosovë’.

“Ambasadori ka shprehë qëndrimin e qeverisë amerikane për kërkesën për pezullim të taksës në mënyrë që me i hapë rrugë dialogut. Është kërkesë e tyre zyrtare. Mirëpo, ata duhet ta thonë vetë se nuk kemi fort të drejtë me i komentu qëndrimet e tyre. Po për hir të opinionit po”, pati konfirmuar kështu Haradinaj kërkesën e SHBA’së për heqjen e taksës.