Vdes motoçiklisti në Komoran të Drenasit në një aksident me dy vetura
Një motoçiklist ka vdekur në një aksident me dy automjete në Komoran të Drenasit mesditën e sotme.
Zëdhënësja e Policisë për rajonin e Prishtinës, Flora Ahmeti i tha Gazetës Express se vdekja e motoçiklistit u konstatua në QKUK.
“Sot rreth orës 13:30 kemi pranuar informatën se në rrugën “Nazmi Gashi ” në Komoran, ka ndodhur një aksident trafiku me pasoja fatale.Në këtë aksident, kanë qenë të përfshira, një motoçikletë dhe dy automjete në lëvizje”, tha ajo.
“Si pasojë e aksidentit, lëndime të rënda trupore ka pësuar motoçiklisti, i cili nuk ka arritë të përballojë plagët dhe i njëjti ka ndërruar jetë. Vdekjen e tij e ka konstatuar ekipi mjekësor në QKUK”, shtoi Ahmeti.
Ajo tha se aktualisht policia ka nisur një hetim për zbardhjen e rrethanave që çuan deri te aksidenti.
