Vdekja e kosovarit në burg: Ja çka raportuan mediat në Serbi
Një shqiptar me nënshtetësi norvegjeze ka vdekur në një burg në Serbi. Periskopi para një jave kishte mësuar për vdekjen e dyshimtë të një kosovari me nënshtetësi norvegjeze në një burg të Serbisë, për çka publikoi dje edhe deklaratën ekskluzive të familjarëve të viktimës, të cilët e konfirmuan si rast.
Lidhur me ngjarjen e rëndë, Periskopi ka kontaktuar direkt Zyrën Ndërlidhëse të Prishtinës në Beograd. Shefi i kësaj zyre, Jetish Jashari në një bisedë telefonike për Periskopin ka thënë se janë duke u marrë me rastin, por që nuk mund të deklarohen direkt për media, pasi këtë gjë e bëjnë përmes Ministrisë së Punëve të Jashtme të Kosovës.
Lidhur më vdekjen e të riut nga Peja akoma nuk është raportuar nga mediat në Serbi. Por, shtypi online atje ka shkruar para disa ditëve lidhur më ‘një incident në burg‘, që sipas familjarëve Zymberi, mund të ndërlidhet më djalin e tyre.
Më 22 nëntor, mediat në Beograd kanë shkruar se një zjarr i vogël ka shpërthyer në një dhomë të burgosurve në Mitrovicën e Sremit, i cili është shuar shpejt dhe nuk ka pasur të lënduar.
Siç raportojnë mediat atje, mbikëqyrësi kujdestar i burgut në orën 23:20 ka lajmëruar zjarrfikësin dhe ka raportuar se ka rënë zjarr në katin përdhes të njërit prej pavijoneve.
“Zjarrfikësit kanë ndërhyrë menjëherë pasi janë thirrur, por në momentin që kanë mbërritur, rojet e burgut vec kanë arritur të shuajnë zjarrin. Nga zjarri nuk ka të lënduar dhe dy të dënuarit nga ajo dhomë janë transportuar për masa paraprake në spitalin e qytetit. Gjithsej gjashtë zjarrfikës të cilët kanë arritur në Institucionin Korrektues Sremska Mitrovica me një automjet kanë kryer kontrollin e vendit të zjarrit. Mesa duket nga zjarri janë djegur disa dyshekë. Nuk dihet ende se si ka rënë zjarri, por do të përcaktohet nga një hetim i detajuar”, shkruan nportal.rs.
Raportimi i mediave në Serbi:
Axha i të ndjerit, Nexhat Zymberi i tregoi Periskopit se e gjithë ngjarja kishte filluar, një vit më parë, kur Artan Zymberaj ishte arrestuar nga policia, për posedim të disa tabletave, hapave që sipas Zymberajt ato tableta kishin qenë të jashtligjshme.
“Ka qenë në burgun Sremska Mitrovica. Është burg i serbëve. Unë kam këqyrë gjithkah nëpër informata, kjo ngjarje ka pas ndodhur para 1 jave, ku kish pas ndodhur një zjarrë aty, kurse 4 gardianë janë lëndu edhe dy të burgosur janë dërguar në Novi Pazar duke u shëruar. Ku nuk e dimë a ka mundur të ketë qenë edhe ky pjesë e kësaj ngjarje”, ka thënë Zymberi.
Çka dihet deri tash?
Familja Zymberi nga qyteti i Pejës, por me vendbanim në Norvegji, në një rrëfim ekskluziv për Periskopin kanë bërë të ditur se djali i tyre, Artan Zymberi ka vdekur në burgun e Serbisë, më saktësisht në (Sremska Mitrovica), ku sipas dyshimeve të kësaj familjeje, Artani është vrarë në këtë burg, vetëm sepse kishte tatu në gjoks; Adem Jasharin, emblemen e UÇK’së, dhe Skëndërbeun.
Vdekjen e Artan Zymberit, e ka konfirmuar vet babai i të ndjerit në një prononcim për Periskopin, ku tha se “po është i vërtetë lajmi, tani jemi në Kosovë, jemi duke shkuar për në Beograd për të marrur kufomën, dhe për të shkuar në Norvegji”.
Por si kishte përfunduar Zymberi në burgun e Serbisë?
Axha i të ndjerit, Nexhat Zymberi i tregoi Periskopit se e gjithë ngjarja kishte filluar, një vit më parë, kur Artan Zymberaj ishte arrestuar nga policia, për posedim të disa tabletave, hapave që sipas Zymberajt ato tableta kishin qenë të jashtligjshme.
Zymberajt i ishte caktuar masa e burgimit për 3 vite, por që sipas tij, ai do të transferohej në Norvegji pas muajit dhjetor, shkruan Periskopi.
I ndjeri ishte në këtë burg tash e një vit, por që sipas Nexhatit, brenda këtij viti asnjëherë nuk kishin pasur kontakt me Artanin, e as nuk ishin takuar pasi që gjithmonë arsyetimi i burgut kur kanë kontaktuar familjarët për të pyetur për Artanin kanë qenë: “ja djali nuk po do me folë, ja nuk është aty, ja është në ushtrime.”
I gjithë dyshimi i tyre për vdekjen e Artanit është sepse ai kishte tatuazh, Adem Jasharin në gjoks, Skëndërbeun në tjetrën anë, shqiponjën, dhe ka pasur edhe emblemen e UÇK’së.
Deklarata e Nexhat Zymberajt:
Na sipas informatave të prifitit që na ka tregu, na ka jep lajmin që djali ka vdekur në burgun Mitrovicës Sremit. (Sremska Mitrovica) Prifti norvegjez, se këtu në Novergji prifit zakonisht i jep informatën që ka ndërruar jetë. Sigurisht përmes konsulatës ka ardh ky informacion, unë nuk kam qenë aty ku ka ardhur ky informacion.
Çka po di unë, e kanë nxonë me do tableta, hapa, nuk e di as vet me çfarë hapa dhe u burgos atje. Dhe madje e kanë dënu 3 vjet. Ai ka nejt që 1 vit e diçka, ai ka pas mu transferu në shtetin norvegjez, sepse ai shtetas norvegjez dhe kështu mas vitit të ri ka pasë që ky ka mu transferu në Norvegji me kry burgun.
Ka qenë në burgun Sremska Mitrovica. Është burg i serbëve. Unë kam këqyrë gjithkah nëpër informata, kjo ngjarje ka pas ndodhur para 1 jave, ku kish pas ndodhur një zjarrë aty, kurse 4 gardianë janë lëndu edhe dy të burgosur janë dërguar në Novi Pazar duke u shëruar. Ku nuk e dimë a ka mundur të ketë qenë edhe ky pjesë e kësaj ngjarje.
Që 1 vit as kontakt, ja djali nuk po do me folë ja nuk është aty ja është në ushtrime. Që 1 vjet nuk kemi pasur kurrfarë kontakti.
Na po dyshojmë se ky ka pasur, tatu, Adem Jasharin në gjoks, Skëndërbeun në tjetrën anë, shqiponjën, ka pasur edhe emblemen e UÇK’së. Ky nuk e ka ditur as gjuhën serbe se ai u lind e rritur në Norvegji. Kanë dyshime se serbët gjithçka bojnë.
Ndërkohë dje, Ministria e Jashtme të Norvegjisë ka konfirmuar për Klankosovën, se një person me nënshtetësi norvegjeze ka vdekur në një burg në Serbi, por pa dhënë detaje tutje nëse viktima është një kosovar.
“Ministria e Punëve të Jashtme e Norvegjisë është në dijeni për vdekjen e një shtetasi norvegjez në Serbi. Shërbimi i Jashtëm norvegjez i ka njoftuar të afërmit dhe ka ofruar ndihmë konsullore. Autoritetet lokale janë përgjegjëse për kushtet e burgjeve në Serbi, duke përfshirë shëndetin dhe sigurinë e të burgosurve. Çdo pyetje në lidhje me një hetim të mundshëm të rrethanave të vdekjes duhet t’u drejtohet autoriteteve serbe”, thuhet në përgjigje. /PERISKOPI/
Vdekja e kosovarit në burg të Serbisë, Zyra Ndërlidhëse për Periskopin: Po merremi me rastin
