Tryeza e Samitit të 10-të të Procesit të Berlinit, nga temat kryesore të takimit do të jetë marrëveshja e CEFTA-s

Liderët e Ballkanit Perëndimor do të ulen të hënën në Tryezën, për të avancuar më tej Procesin e Berlinit, që është ndër urat lidhëse të mes rajonit tonë dhe Bashkimit Europian.

Tryeza udhëhiqet nga vendi iniciues, Kancelari gjerman Olaf Sholz, i cili që në krye të herës vendosi të vijonte agjendën e ish-kancelares, Angela Merkel, për të lidhur me fortë vendet e rajonit mes njëri-tjetrit dhe progresin për në Bashkimin Evropian.

Në të njëjtën tryezë do të jenë liderët e rajoneve – Kosovës, Serbisë, Malit të Zi, Shqipërisë, Maqedonisë së Veriut dhe Bosnjë-Hercegovinës, ndërsa në Samit do të marrë pjesë edhe kryetarja e Komisionit Evropian Ursula von der Leyen.

Një nga temat kryesore të takimit në Berlin do të jetë Cefta dhe për shkak të nëntë marrëveshjeve të reja të miratuara, por mbi të gjitha sepse pas një viti e gjysmë, Kosova, ndonëse pjesërisht, hoqi ndalimin e importit të mallrave serbe, pas paralajmërimeve se do të përjashtohej nga ajo marrëveshje.

Në pritje të Samitit të Procesit të Berlinit, kryeministri i Kosovës, Albin Kurti, theksoi domosdoshmërinë e bashkëpunimit rajonal, duke theksuar nevojën e zbatimit të marrëveshjes për lëvizjen e lirë ndërmjet Kosovës dhe Bosnjë e Hercegovinës, e cila kontribuon për qytetarët e Kosovës dhe Bosnjë e Hercegovinës.

Ndryshe, Kurti tashmë ndodhet në Gjermani, ku së bashku me ministren e Punëve të Jashtme, Donika Gërvalla, praktikisht në funksion të kryetares së partisë, po bisedojnë me diasporën kosovare, në radhë të parë për zgjedhjet e ardhshme në Kosovë.

Përveç kësaj, do të mbahet një takim i Forumit të Rinisë dhe Shoqërisë Civile, i cili u mblodh tashmë këtë javë në Berlin.

Kjo tryezë në kuadër të Samitit të Berlinit vjen ndërsa dy ditë më pas, të mërkurën  mbahet në Bruksel, Konferenca e dytë Ndërqeveritare mes Shqipërisë dhe Bashkimit Europian, kur vendi ynë do të çelë grupin e parë të negociatave.

Takimi i fundit i Procesit të Berlinit u zhvillua në Tiranë, më 16 tetor të 2023, që ishte u dhjeti në serinë e samiteve të tilla dhe i pari që u zhvillua në një vend jo anëtar të BE-së.

Të hënën liderët e Ballkanit Perëndimor dhe ata të Bashkimit Europian, do të mblidhen në Berlin, ndërsa shënohen 10 vite nga momenti që nisi ky Proces, më 28 gusht të 2014.

Gjashtë vendet e Ballkanit Perëndimor pritet të aprovojnë të hënën planin e ri katërvjeçar të veprimit për tregun e përbashkët rajonal, si dhe të ketë marrëveshje të re për qasje në studime në shkolla të mesme.