Torres kërkon shkarkimin e zyrtares amerikane që kishte shkruar “bëje Kosovën Serbi”: Duhet ta pushoni menjëherë
Kongresmeni, Ritchie Torres, i është drejtuar me një letër Sekretarit Amerikan të Mbrojtjes Pete Hegseth, me kërkesën të shkarkojë nga pozita e Zëvendës Sekretares së Shtypit në Departamentin amerikan të Mbrojtjes, Kingsley Wilson.
Wilson në vitin 2023 publikisht kishte shkruar “bëje Kosovën Serbi përsëri”.
Në letrën e Torres thuhet se zyrtarja në departamentin e Mbrojtjes ka përforcuar “propagandën anti-Kosovë, një sulm i drejtpërdrejtë ndaj më pro-amerikanëve aleate në Evropë, gjë që e përafron atë me interesat e Vladimir Putin”.
Kongresmeni Torres në fillim të letrës vlerëson se emërimi i Wilson si Zëvendës Sekretare e Shtypit të Pentagonit është një fyerje për integritetin e Departamentit të Mbrojtjes.
Ai bazohet në kërkimet në profilet e saj në mediat sociale, që përmend se “Wilson edhe ka promovuar hapur teorinë e “zëvendësimit të madh”, një komplot racist që ka frymëzuar të shtëna masive dhe sulme terroriste kundër komunitetit hebre…”
Prandaj Torres i thotë Sekretarit Hegseth se “nëse Kingsley Wilson është tipi i personit që ju besoni se duhet të përfaqësojë Departamentin e Mbrojtjes, kjo ngre pyetje serioze për gjykimin tuaj – dhe përkushtimin tuaj ndaj vlerave që përcaktojnë këtë komb”.
“Prania e vazhdueshme e Wilson në Pentagon është një njollë në reputacionin e tij dhe unë ju bëj thirrje që të pushoni atë menjëherë”, bën thirrje ai.
Wilson, në fund të vitit 2023, para emërimit kishte shkruar në rrjetin social ‘X’, “Make Kosovo Serbia again” apo në shqip ” Ta bëjmë Kosovën sërish Serbi”.
