Tonale thuhet se do t’ia dyfishojë shitjet Alfa Romeos

Në fillim të shkurtit të këtij viti Alfa Romeo prezantoi modelin Tonale, një SUV ky kompakt krejtësisht i ri, një klasë më i ulët se modeli Stelvio.

Konkurrentët e drejtpërdrejtë të Tonales janë BMW X1, Mercedes GLA, Audi Q3 dhe Volvo XC40, si dhe modeli Jeep Compass, me të cilin Tonale ndan të njëjtën platformë.

Shitja e modeleve të prodhuesit të njohur italian kishte rënë vitin e kaluar, duke shënuar vetëm 55,000 ekzemplarë të shitur, që i bie 8,300 ekzemplarë më pak sesa numri i shitjeve në vitin 2020.

Sipas portal Auto News Europe, Alfa Romeo Tonale pritat t’i dyfishojë këto shifra. Kjo për shkak se me SUV’in e ri Alfa po hyn brenda segmentit më popullor të modeleve, atë SUV’ëve kompakt, me diku 2.5 deri në tre milionë copë të shitura në vit. Rrjedhimisht, italianët besojnë se Alfa Romeo Tonale do t’ua rrisë shitjet në mbi 100,000 njësi në vit.

Përndryshe, Alfa Tonale është modeli i parë i elektrizuar i prodhuesit italian, edhe pse nuk është planifikuar të jetë version plotësisht elektrik. Aktualisht ofrohen dy motorë kryesorë me benzinë: 1.5 turbo hybrid me 130 apo me 160 KF, dhe motori 1.3 turbo i kombinuar, me opsionin plug-in dhe me fuqi të përgjithshme prej 275 KF.