Të shtëna me armë në Velipojë, dy të vdekur

Merr përmasa tragjike ngjarja në Velipojë. Dy personat që mbetën të plagosur me armë zjarri mbrëmjen e kësaj të hëne, kanë humbur jetën në spital.

Viktimat u qëlluan për vdekje nga 2 vëllezër dhe sipas policisë shkak për ngjarjen e rëndë qëndrojnë motivet e dobëta.

Të shtënat ndodhën rreth orës 21:00, pranë stacionit të autobusëve të Velipojës.

“Më datë 19.08.2024, rreth orës 21:00, në Velipojë, dyshohet se për motive të dobëta, dy vëllezërit E.F., dhe G. F., dyshohet se kanë plagosur me armë zjarri shtetasit A. H., dhe E. I, të cilët u transportuan menjëherë për ndihmë mjekësore në Spitalin Rajonal të Shkodër por si pasojë e plagëve të marra humbën jetën në spital.

Me marrjen e njoftimit, kanë shkuar menjëherë në vendngjarje, shërbimet e Drejtorisë Vendore të Policisë Shkodër, Drejtuesit e Drejtorisë dhe të Komisariatit të Policisë Shkodër, si grupe të Forcës Kombëtare të Sigurisë, Njësia Shkodër.

Njëkohësisht është ngritur një grup i posaçëm hetimor i cili ndodhet në vendngjarje dhe po vijon punën intensive në bashkëpunim me Prokurorinë për sigurimin e provave me qëllim dokumentimin ligjor të kësaj ngjarjeje”, tha policia në një njoftim për mediat./Tv Klan