Duke folur për sulmin terrorist të 29 nëntorit në veri të vendit, Tahiri ka thënë se Qeveria ka dështuar të “bind aleatët se Serbia qëndron prapa këtij sulmi”.

“Kjo ka dështuar në shumicën e elementeve që do të duhej të forconin sovranitetin e Kosovës, ka dështuar. Këta i thonë popullit të Kosovës që ne e kemi shtrirë sovranitetin në një oborr të një komune.. E kemi humbur Këshillin e Evropës për shkak të eksperimentimit dhe shakave të udhëheqësve shtetëror. Qysh ka mundësi, presidentja, kyreparlamentari dhe kryeministri të shkruajnë letër që po e pranojmë Asociacionin pa e marrë anëtarësimin në Këshill të Evropës”, ka theksuar ai.

Tahiri u pyet edhe për ndërhyrjen e FSK-së në veri dhe nëse duhet një protokoll i ri bashkëpunimi. Ai ka thënë se ndërtimi i marrëdhënieve me NATO-n, duhet të ndodh shumë më shpejtë, përmes planit aksional për anëtarësim direkt në NATO, të cilën sipas tij, e parasheh AAK-ja.

Sa i përket zgjedhjeve të 9 shkurtit, shefi i deputetëve të AAK-së, Tahiri ka thënë se pret që partitë opozitare të fitojnë garën elektorale, duke shtuar se formimi i Qeverisë së ardhshme nuk do të jetë proces i lehtë.

“Unë pres një rezultat që do të befasojë krejt Kosovën. Për këtë jam i bindur, pasi kam qenë edhe pjesë e punës katërvjeçare, mirëpo edhe të ndërtimit të këtij koncepti që ka ndodhur në Aleancë. Ka pakënaqësi të mëdha për këto katër vjet. Ka pakënaqësi pasi qytetari është më i varfër, më i pasigurt dhe ekonomia është më e dobësuar. Shpresa që është rritur me opsionin krejt dhe drejt ka mbetur vetëm për anëtarët e LVV-së, jo për qytetarët e Kosovës. Unë pres që partitë opozitare të fitojnë garën elektorale. Pres një proces negociator jo të lehtë për ta bërë qeverinë. Kjo do të shihet. Nuk ka me qenë lehtë pas 9 shkurtit për me formu qeverinë…Lëvizja Vetëvendosje nuk i fiton zgjedhjet. Duke mos i fituar zgjedhjet këta nuk do të munden të formojnë qeverinë”, ka përfunduar ai./KP