Sot mbahet seanca ndaj ish-kryeshefit të KEK-ut, Nagip Krasniqit, dyshohet për dëm të KEK-ut në vlerë rreth 3 milionë euro

Sot do të mbahet seanca gjyqësore ndaj Nagip Krasniqit, i akuzuar për keqpërdorim detyre në dëm të KEK-ut në vlerë rreth 3 milionë e 230 mijë euro.

Seanca nis në orën 09:30 në Gjykatën Themelore në Prishtinë.

Prokuroria Speciale ka ngritur aktakuzë më 19 gusht të këtij viti ndaj ish-kryeshefit të Korporatës Energjetike të Kosovës, Nagip Krasniqi për veprën penale të keqpërdorimit të pozitës apo autoritetit zyrtar. Ai akuzohet se kishte filluar ta keqpërdorë detyrën zyrtare që nga 15.10.2021 deri më 19.04.2023.

Në padi thuhet se Krasniqi i kishte mundësuar tregtimin e energjisë një kompanie sllovene në Kosovë, e cila nuk kishte licencë, duke dëmtuar kështu KEK-un në vlerë rreth 3 milionë e 230 mijë euro, gjë që i mundësoi kompanisë nga Sllovenia tregtimin e energjisë elektrike në Republikën e Kosovës.

Krasniqi ishte arrestuar më 19 prill, nën dyshimet për tri vepra penale, të keqpërdorimit të pozitës zyrtare, ushtrimit të ndikimit dhe konfliktit të interesit. Rasti përfshin dy kontrata njëburimore në vlerë 3.5 milionë euro.

Pas arrestimit, atij i ishte pezulluar pozita në krye të KEK-ut.

Krasniqi ishte liruar nga paraburgimi, me vendim të Gjykatës Themelore në Prishtinë në shtator të 2023-ës.

Shtyhet nisja e gjykimit ndaj ish-kryeshefit të KEK-ut, Nagip Krasniqit