Simptoma e menopauzës për të cilën askush nuk flet

Menopauza supozohet të jetë fundi i shumëpritur i vuajtjeve të përmuajshme. Por, imagjinoni sa e çuditshme është të kesh më shumë perioda se më parë, edhe pse pritet që cikli të ndalohet përfundimisht.

Një studim i ri ka zbuluar se gjakderdhja e shumtë dhe që zgjat për disa ditë më shumë se më parë, është e zakonshme tek 91% e grave që janë afër fazës së menopauzës. Profesoresha e Universitetit të Miçiganit, Sioban Harlow së bashku me ekipin e saj analizuan të dhënat e më shumë se 1300 grave të moshës 42-52 vjeç.

91% raportuan se kishin pasur raste kur cikli menstrual u kishte zgjatur më shumë se 10 ditë në 3 vitet e fundit; 88% tregonin se cikli u zgjaste më shumë se 6 ditë; ndërsa 78% kishin pasur gjakderdhje të shumtë mbi 3 ditë.

Harlow thotë se ky tranzicion mund të zgjasë diku mes 2-8 vjet. “Është faza ku funksioni i vezores fillon të bie dhe rregullimi hormonal nuk është aq i mirë sa në moshën 30 vjeç”, shpjegon ajo.

Megjithatë, përse është kaq e zakonshme nuk do të thotë se duhet t’i injoroni simptoma të tilla si: keni 3 episode të tilla brenda 6 muajsh, mpiksje të gjakut ose gjakderdhje që vazhdon për më shumë se 2 javë. Në këtë rast, bëni një vizitë mjekësore. /.Gazeta shendeti/