Shpërthen zjarri në një vend ku po shiteshin mjete piroteknike në Prizren, lëndohet një person
Një person ka marrë lëndime si pasojë e zjarrit që shpërtheu në një pikë shitjeje të mjeteve piroteknike në Prizren.
Zëdhënësi i Policisë për rajonin e Prizrenit, Shaqir Bytyqi, ka thënë për KOHËN se rreth orës 21:33 ka ndodhur një shpërthim zjarri në rrugën “Ahmet Prishtina” në Prizren, në një vend ku po shiteshin mjete piroteknike skaj rruge.
Si pasojë e zjarrit një person ka marrë lëndime, ndërsa janë prekur edhe lokalet e ndërtesat përreth dhe është dëmtuar një veturë. Zjarrfikësit kanë arritur ta lokalizojnë zjarrin.
“Më datë 31.12.2024 rreth orës 21:33 është raportuar se në rrugën ‘Ahmet Prishtina’ në Prizren ka ndodhur një shpërthim i zjarrit nga ndezja e një pike shitjeje e mjeteve piroteknike në trotuar dhe si pasojë është përhapur zjarri edhe në lokalet dhe ndërtesat përreth. Si pasojë e këtij incidenti deri më tash kemi një të lënduar që është në Emergjencë dhe sipas informatave të deritashme është duke u dërguar në QKUK në Prishtinë. Gjithashtu janë shkaktuar dëme në objektet dhe automjetet e parkuara në afërsi. Të gjitha njësitet policore kanë dal në vendin e ngjarjes. Gjithashtu kanë dal në vendin e ngjarjes njësitet e zjarrfikësve të cilët kanë arritur ta shuajnë zjarrin. Situata është nën kontroll”, ka thënë Bytyqi.
