Shëroni plasaritjet e buzëve me këto mënyra natyrale

Përveçse jo estetike, buzët e plasaritura mund të gjenerojnë bezdisje dhe madje në rastet më ekstreme edhe dhimbje. Shkaqet mund të jenë të shumëfishta. Dëmtimi nga dielli është një nga shkaqet kryesore të buzëve të çara. Ato mund të shkaktohen gjithashtu nga dehidratimi, infeksione të ndryshme që mund t’i merrni në plazh, mungesa e vitaminës B etj.

Buzët konsiderohen si pjesa më e ndjeshme e fytyrës dhe trupit. Ndryshe nga fytyra, e cila është e mbrojtur nga një lëkurë më e trashë, buzët janë të mbuluara me një lëkurë shumë të hollë, prandaj thahen shpejt.

Ja disa kura natyrale për të shëruar buzët e plasaritura.

Sheqeri, mjalti, petalet e trëndafilit, vaji i kastorit dhe qumështi mund të përdoren si kura natyrale për buzët e çara.
Sheqeri ndihmon në largimin e qelizave të vdekura nga buzët e çara, ndërsa mjalti vepron si zbutës i buzëve. Ai ka gjithashtu veti shëruese dhe antimikrobiale.

Sheqer dhe mjaltë

Përzieni dy lugë çaji sheqer me dy lugë çaji mjaltë për të formuar pastën. E aplikoni atë tek buzët dhe mbajeni për pak minuta. Në fund i lani buzët me ujë të vakët.

Petalet e trëndafilit dhe kremi i qumështit ndihmojnë në menaxhimin e buzëve të çara, duke qenë se veprojnë si zbutës natyral të buzëve.

Petale trëndafili dhe qumësht

Lajini petalet e trëndafilit dhe hidhni në një enë me qumësht. Lërini aty për disa orë. Më pas i shtypni mirë petalet deri sa të formohet një masë homogjene, dhe e aplikoni tek buzët 2-3 herë në ditë, si dhe para se të flini.

Vaji i kastorit shihet gjithashtu si një trajtim efektiv për buzët e thata dhe të plasaritura.

Vaj kastori dhe lëng limoni

Mund ta përdorni atë ashtu siç është, ose të përzieni me një lugë çaji glicerinë dhe pak pika lëng limoni. Vendoni këtë përzierje tek buzët para se të flini.