Shefi i NATO-s bën thirrje për heqjen e kufizimeve të armëve në Ukrainë: Ne po ia lidhim njërën dorë forcave ukrainase

“Duke pasur shumë kufizime ne po ia lidhim njërën dorë forcave të armatosura ukrainase”, tha Sekretari i Përgjithshëm i NATO-s, Jens Stoltenberg, duke u kërkuar shteteve të NATO-s të rishqyrtojnë kufizimet për dërgesat e armëve në Ukrainë.

“I takon aleatëve të vendosin mbi kufizimet e armëve që i dërgojnë Ukrainës. Ky nuk është një vendim i NATO-s, është vendim i marrë nga aleatë individualë”, tha Stoltenberg.

“Mesazhi im është se mendoj se ka ardhur koha të shqyrtojmë disa nga këto kufizime”, shtoi ai.

Kjo deklaratë nga shefi i NATO-s vjen pasi çështja e dërgimit të disa armëve në Ukrainë mbetet e diskutueshme, shkruan euronews.

Bëhet e ditur se disa shtete po hezitojnë t’i sigurojnë Kievit armë me rreze të gjata dhe të fuqishme që mund të godasin thellë brenda Rusisë, pasi kanë frikë se ato mund të përshkallëzojnë tensionet dhe mund ta dërgojnë Evropën në një luftë më të gjerë.

Të tjerë thonë se Ukraina ka nevojë për të gjitha armatimet që mund të marrë për të shmangur një kundërshtar të madh si Rusia, duke theksuar se Moska nuk tregon kufizime kur e sulmon Ukrainën dhe objektet e saj civile.

Stoltenberg vuri në dukje se disa shtete brenda aleancës ushtarake kanë hequr kufizimet e armëve specifike për Ukrainën, megjithëse jo të gjitha.

Ai u bëri thirrje shteteve që të rishqyrtojnë vendimin e tyre duke përmendur “natyrën e luftimeve në Kharkiv”.

“Por, përsëri këto janë vendime individuale, e jo të NATO-s”, tha sekretari.

Ndryshe, SHBA-ja, Britania e Madhe dhe Franca i kanë ofruar Ukrainës raketa me rreze të gjata veprime, megjithëse kancelari gjerman, Olaf Scholz, ka përjashtuar mundësinë e dërgimit të raketave Tauras pavarësisht kërkesave të përsëritura nga Kievi.

Scholz pretendon se raketa e cila mund të lokalizojë dhe shkatërrojë një objektiv do të duhej të operohej nga ekipet gjermane në terren në Ukrainë, diçka që ai e konsideron si “vijë të kuqe”.