Samiti me liderët evropian, Von der Leyen: Duhet që të përgatitemi për më të keqen
Shefja e Komisionit Evropian, Ursula von der Leyen, në përfundim të samitit me liderët evropian, përshkroi takimin si një “diskutim të mirë dhe të sinqertë”.
Ajo thotë se ata diskutuan nevojën për garanci gjithëpërfshirëse të sigurisë, duke përfshirë vendosjen e Ukrainës në një pozicion të fortë dhe sigurimin që ajo të ketë mjetet për të “fortifikuar dhe mbrojtur” veten.
Von der Leyen thotë se kjo varion nga mbijetesa ekonomike deri te qëndrueshmëria ushtarake.
“Ne duhet të kemi një rritje në mbrojtje, ne me të vërtetë duhet të rritemi masivisht”, tha ajo duke shtuar kështu se nevojitet një plan i qartë nga Bashkimi Evropian dhe një qasje e përbashkët evropiane, raporton euronews
“Tani është me rëndësi të madhe që të rrisim shpenzimet, është e rëndësishme që të përgatitemi për më të keqen,” thotë ajo.
Shefja e Komisionit Evropian i dërgon gjithashtu një mesazh presidentit të SHBA-së, Donald Trump, duke thënë: “Ne jemi gati së bashku me ju të mbrojmë demokracinë, të mbrojmë parimin se ekziston një shtet ligjor që nuk mund të pushtoni fqinjin tuaj ose nuk mund t’i ndryshoni kufijtë me forcë. Është në interesin tonë të përbashkët që ne të parandalojmë luftërat e ardhshme,” shton ajo.
