Sa rritet konsumi i karburantit me gomat jo të fryra sa duhet?

Sa shpesh i kontrolloni gomat tuaja? Ekspertët e auto klubit gjerman ADAC këshillojnë matjen e presionit të gomave çdo dy javë.

Edhe një gjysmë bar më e ulët se vlera e përshkruar ndryshon karakteristikat e drejtimit të veturës, për shembull, distanca e frenimit rritet dhe kthesat përkeqësohen, transmeton Telegrafi.

Rezistenca më e lartë e rrotullimit të gomave do të thotë që konsumohet deri në 0,3 litra më shumë karburant për 100 kilometra.

Për shkak të kësaj, tre miliardë litra karburant konsumohen çdo vit në Evropë.

Nëse presioni i gomave është shumë i lartë, ndikon negativisht në komoditetin e vozitjes, dhe konsumimi është gjithashtu i pabarabartë.

“Për arsye komforti, prodhuesit zakonisht specifikojnë vetëm një presion minimal. Një rritje prej 0.2 bar është mezi e dukshme për sa i përket komoditetit, por zvogëlon konsumin e karburantit pa sakrifikuar sigurinë”, këshillon eksperti i ADAC, Ruprecht Müller.

Është mirë të matni presionin e gomave përpara se të vozitni ose pasi të keni kaluar disa kilometra. Një temperaturë e jashtme prej 20 gradë Celsius është ideale.