Rukiqi kritikon Qeverinë Kurti: Raporti i Bankës Botërore konfirmon dështimin ekonomik

Berat Rukiqi, anëtar i kryesisë së Lidhjes Demokratike të Kosovës (LDK), ka shkruar në Facebook për raportin e Bankës Botërore.

Ai tha se raporti në fjalë konfirmon dështimin e Qeverisë së Kosovës udhëhequr nga Albi Kurti.

Problematike, sipas Rukiqit janë gjetjet për nivelin e ulë të punësimit, ku vetëm 37.1% e popullsisë në moshe pune punon.

Postimi i plotë:

RAPORTI I BANKES BOTERORE KONFIRMON DËSHTIMIN E QEVERISË

Kosova renditet e fundit në Ballkan dhe Evropë me numrin e të punësuarve.

Katër vjet mandat pa ndonjë iniciativë serioze ekonomike ose projekte zhvillimore. Paaftësia e qeverisë po e shtyn vendin në një krizë ekonomike me pasoja afatgjatë.

Disa nga të gjeturat kryesore të raportit të Bankës Botërore

1. Punësimi në Kosovë: 2/3 e popullsisë në moshë pune, nuk punojnë. Norma e punësimit në Kosovë është më e ulëta në Evropë, me vetëm 37.1% të popullsisë në moshë pune të punësuar, krahasuar me vendet e rajonit, ku mesatarja është 48.5%, ndërsa në Bashkimin Evropian, ku është 54.5%.

2. Rritja Ekonomike: Për vitin 2023, rritja ekonomike e Kosovës është 3.3%, ndërsa për vitin 2024 pritet të jetë 3.8%. Kjo është më e ulët se mesatarja e rritjes ekonomike prej 4% që ishte para pandemisë. Një normë e tillë e rritjes ekononomike, nuk garanton as zhvillim, as vende pune, as investime, as shëndetësi më të mirë, as paga më të mira për qytetarë.

3. Deficiti Tregtar: Kosova është i vetmi vend në rajon ku volumi tregtar ka një ndikim negativ në rritjen ekonomike për shkak të deficitit të lartë tregtar, që arrin rreth 5.2 miliardë. Dyfishimi i deficitit tregtar, për 3 vite të kësaj Qeverie, janë indikator i qartë i mungesës së investimeve, sidomos investimeve në përkrahje të prodhimit dhe eksporteve.

4. Popullsia Aktive në Tregun e Punës: Vetëm 42.7% e popullsisë aktive në Kosovë është pjesë e tregut të punës, një shifër që është më e ulëta në rajon (mesatarja rajonale është 54.4%).

Kjo përqindje e ulët lidhet edhe me emigrimin e lartë, si pasojë e liberalizimit të vizave, që ka rezultuar në një largim prej rreth 23,700 personash nga popullsia në moshë pune.

Nën udhëheqjen e Lumir Abdixhikut, LDK ka një plan praktik për të krijuar vende pune, zhvilluar ekonominë dhe ndaluar ikjen e rinisë sonë.

Rruga e Re eshtë rruga e vetme drejt zhvillimit ekonomik, e ndryshimin për Kosovën që e duam do ta sjell LDK.