Rrokulliset një veturë në rrugën Mitrovicë – Prishtinë, lëndohet shoferi
Një aksident i rëndë trafiku ka ndodhur këtë të martë në fshatin Stanovc të Komunës së Vushtrrisë.
Lajmin për aksidentin e ka konfirmuar zëdhënësi i policisë për rajonin e Mitrovicës, Avni Zahiti.
Zahiti ka bërë të ditur se nga ky aksident një person ka pësuar lëndime trupore.
“Aksident trafiku me lëndime, i ndodhur sot rreth orës 08:40 në rrugën nacionale Mitrovicë- Prishtinë, përkatësisht në segmentin rrugorë në fshatin Stanovc, në aksident janë përfshirë një kamion dhe një veturë, përveç dëmeve materiale lëndime ka pësuar, shoferi i veturës”, ka thënë Zahiti.
Në fotografitë e publikuara në rrjetet sociale shihet se dëmet materiale janë të mëdha, ndërsa, si pasojë e këtij aksidenti janë krijuar edhe kolona të gjata në magjistralen Vushtrri-Prishtinë.
