Reagon Mbappe për herë të parë pas finales së humbur
Kylian Mbappe është zotuar se ai dhe Franca do të rikthehen fuqishëm në Kupën e Botës, pas disfatës zhgënjyese në finale të Botërorit Katari 2022 të dielën.
Mbappe shënoi het-trik, duke u bërë vetëm lojtari i dytë në histori që i shënon tri gola në finale, duke i ndihmuar Francës t’i sigurojë vazhdimet dhe pastaj penalltitë.
Por nuk ishte e shkruar për 23-vjeçarin që ta fitojë dy herë radhazi Botërorin, pas Rusia 2018, sepse Argjentina fitoi në penallti 4:2.
Në një reagim një ditë pas ndeshjes në rrjetet sociale, ylli i Paris Saint-Germain u zotuar: “Ne do të rikthehemi”.
Nous reviendrons. 🇫🇷🙏🏽 pic.twitter.com/Ni2WhO6Tgd
— Kylian Mbappé (@KMbappe) December 19, 2022
Mbappe e fitoi Këpucën e Artë në Kupën e Botës 2022, si golashënuesi më i mirë i turneut, me 8 gola, duke e lënë mbrapa bashkëlojtarin e vet në klub, Lionel Messin e Argjentinës me 7 gola.
Ai i shënoi dy gola për dy minuta në pjesën e dytë të finales në Katar, atëherë kur Francës i duhej më së shumti për ta shmangur disfatën në finale. Së pari nga penalltia, pastaj nga loja e hapur.
Pasi Messi e kaloi Argjentinën në epërsi përsëri në vazhdime, Mbappe shënoi edhe një herë nga penalltia që e fitoi vetë në çastet e fundit, për ta çuar ndeshjen në penallti.
