Ragip Xhaka: Vuajtjet që i kam kaluar në burgun e Dubravës s’ua kam treguar as Granitit e as Taulantit

Kandidati i PDK-së për deputet, Ragip Xhaka, në një intervistë në  T7 ka folur për raportet e tij me djemtë, Granitin dhe Taulantin. Xhaka ka thënë se gjithmonë ka qenë i përkushtuar që ata të ndjejnë veten gjithmonë shqiptar, meqë ka pasur frikë se për shkak të jetesës në një shtet të huaj, kanë mundur të devijojnë në ndonjë punë tjetër.

Xhaka thotë se gjithmonë bashkë me gruan, iu kanë folur për Kosovën e Shqipërinë.

“Frymëzimi im për të dy djemtë ka qenë gjithmonë që të ndjejnë veten si shqiptar, sepse duke u rritur në një vend të huaj, ka qenë frika e madhe e imja dhe shoqes time se mos po na devijojnë në ndonjë punë tjetër. Ne kemi folë për Kosovë e Shqipëri, që ata me e ndje Kosovën. Unë ua kam tregu pjesën time në burg”, ka thënë ai.

I pyetur për vuajtjet e tij në Kosovë nga regjimi serb, Xhaka ka thënë se vuajtjet e kaluara në Dubravë s’ua ka treguar ende të dy djemve, meqë s’dëshiron që t’i shqetësojë.

Megjithatë thotë se një ditë do t’i thotë të gjitha.

“Gjatë Dubravës kam përjetuar gjëra shumë të këqija, s’ua kam thënë, e s’mundem as sot. E ndjej veten fajtor, t’ua tregoj edhe djemve të mi që vuajtja ime ka qenë shumë e rëndë”.

“Do të vijë koha që një ditë do t’i them të gjitha”, ka thënë Ragip Xhaka.