Pse Albin Kurti është i vetmi lider sot, që nuk e uron dot kryeministrin e Shqipërisë!

Kur përzihesh në kopshtin politik të tjetrit!

Kryeministra, presidentë, politikanë partish të ndryshme nga Europa po e urojnë Edi Ramën për fitoren elektorale.

Vetëm Lëvizja Vetëvendosje po hesht.

Dhe heshtja ka një shpjegim: kur hyn në një garë politike në një shtet tjetër për të luftuar partitë e atjeshme, tensionet e keqkuptimet janë të pashmangshme. Këtë e ka bërë VV.

Para se një parti nga Kosova të fusë hundët në politikën aktive në Shqipëri, duhet të krijohet baza ligjore për këtë. E baza ligjore është bashkimi politik, për shembull.

Meqë kjo ide s’duket askund në horizont, VV preferoi të bëjë eksperimente politike. Eksperimenti dështoi.

Në kujtesë mbetën kryeministri, ministra dhe deputetë arrogantë të VV-së që merreshin me kanalizimin e Kurveleshit, moçalet e Mallakastrës dhe kopallat e Kavajës. Dhe këtë e bënin pa fije turpi duke pirë kafe në diellin e Durrësit, ndërsa Kosova përballet me krizën më të rëndë që nga viti 1999.

Ai defilimi i shefit të VV-së nëpër Lezhë si një “figurë mitike skenderbegiane” tani, më shumë se atëherë, i ngjan një karikature. Kritikë meritojnë edhe ata politikanë shqiptarë nga Maqedonia e Veriut dhe nga Lugina e Preshevës që u bënë vegla të shefit të VV-së në shëtitjen e madhe të Lezhës.

Siç nuk kanë arritur disa politikanë të Tiranës t’i bindin udhëheqësit e Kosovës në vitet 90-të se “autonomia brenda Jugosllavisë është zgjidhja më e mirë për Kosovën”, madje duke shtuar se “pavarësia e Kosovës nuk është ide moderne europiane”, edhe politikanët e Kosovës nuk do të arrijnë ta “edukojnë” elektoratin e Shqipërisë për t’ia treguar “udhën e duhur”.

Ndryshimet në çdo shoqëri vijnë nga brenda.

Tani mbetet të shihet si do të shkojë bashkëpunimi mes qeverive të Prishtinës dhe Tiranës.

Kaq dihet: besimi i ndërsjellë është minimal.