Plagosja e tre personave me armë zjarri në Pejë, Gjykata vendos për dy të dyshuarit

Gjykata Themelore e Pejës ka aprovuar kërkesën e Prokurorisë Themelore të Pejës për caktimin e masës së paraburgimit ndaj Agron Gashit, i cili dyshohet për tentim vrasje e cila ndodhi në mbrëmjen e së mërkurës, ku mbetën të plagosur tre persona.

Ndaj tij, gjykata ka caktuar masën e paraburgimit në kohëzgjatje prej një muaji, ndërsa për të dyshuarën për dhënie të ndihmës pas kryerjes së veprës penale, Liridona Gashi është caktuar arrest shtëpiak po ashtu për një muaji.

Lajmin e ka konfirmuar gjyqtari i procedurës paraprake, Shaqë Curri. Caktimi i paraburgimit për dy të dyshuarit u bë pas mbajtjes së seancës dëgjimore.

Ndryshe, dy të dyshuarit e lartcekur janë arrestuar të enjten nga Policia e Kosovës.

Policia në mbrëmjen e së mërkurës konfirmoi se tre persona janë plagosur si pasojë e të shtënave me armë zjarri në Pejë, në rrugën “Bekim Berisha-Abeja”.

Mëngjesin e së enjtes, Policia e Kosovës (PK) përmes publikimit të fotografisë ka kërkuar nga qytetarët ndihmë për arrestimin e Gashit. Sipas Policisë, i dyshuari është recidivist i veprave penale./Betimi për Drejtësi