Pensionohet Taulant Xhaka
Taulant Xhaka ka vendosur të pensionohet: Legjenda e gjallë e FC Basel do ta mbyllë karrierën e tij pas përfundimit të këtij sezoni.
Pas 406 ndeshjesh dhe mbi dhjetë vjet me FC Basel, Taulant Xhaka (33) po tërhiqet nga futbolli duke u pensionuar. Në një video emocionuese në kanalet sociale të FCB, ai njoftoi pensionimin e tij.
“FCB dhe qyteti për mua do të thotë gjithçka si një baseljan. Kam lindur dhe u rrita këtu. Të luash një herë për këtë ekip ka qenë gjithmonë një ëndërr për mua”.
Për vëllain e kapitenit të Kombëtares së Zvicrës, Granit Xhaka, ky është momenti perfekt për të dhënë dorëheqjen: “Numri im ka qenë gjithmonë 34 dhe në mars do të bëj 34 vjeç. Më duket e drejtë, sepse klubi është në një formë shumë të mirë dhe jemi në rrugën e suksesit”.
Për të ka qenë gjithmonë e rëndësishme të mund të vendoste vetë kur të tërhiqej nga futbolli. Kështu, ai i kërkoi klubit të ndërpresë kontratën që ishte e vlefshme deri në vitin 2027, dhe ta mbyllte atë që në verën e këtij viti.
«Gjithmonë në zemrën time»
Xhaka shprehu falënderimet për tifozët e FCB, duke thënë: «Dua t’ju falënderoj të gjithëve. Edhe në kohët e vështira, ju qëndruat gjithmonë pas meje. Do të mbeteni gjithmonë në zemrën time.»
Në fund të videos, ai e përmbylli me një mesazh të fuqishëm: «Por tani nuk është ende vera. Le të japim gjithçka së bashku. Ne në fushë, ju në shkallët. Të gjithë së bashku.»
Debutimi para 15 vitesh
Taulant Xhaka kaloi gjithë rininë e tij te Baseli dhe bëri debutimin e tij për ekipin e parë në Kupën e Zvicrës në verën e vitit 2010.
Në shkurt 2011, ai debutoi edhe në Superligën Zvicerane ndaj Luzernit. Nga 2012 deri në 2013, ai ishte i huazuar për një vit te GC, ndërsa pjesa tjetër e karrierës e kaloi me FCB. Me ekipin e Baselit fitoi gjashtë herë titullin kampion të Zvicrës.
Pavarësisht se kaloi nëpër ekipet e rinj të Zvicrës, Taulanti vendosi të luajë për Kombëtaren e Shqipërisë, ndryshe nga vëllai i tij. Ai ka luajtur 30 ndeshje dhe në Euro 2016 u përball me Zvicrën dhe vëllain e tij Granitin.
