Pedagogia italiane iu flet nxënësve kosovarë mbi vlerat ushqyese: Na goditën reagimet e mësuesve
Paola Cavazzoni, një pedagoge dhe drejtoreshë menaxhuese e iniciativës “Pause Atelier dei Sapori”, ka qenë së fundmi në Kosovë, duke kërkuar të rrisë ndërgjegjësimin për parimet dhe vlerat e qasjes ndaj ushqimit, shijes dhe të ushqyerit në edukimin e fëmijërisë.
Ekipi nga Italia u takua me nxënës, mësues, drejtorë dhe kuzhinierë të shkollave të përfshira në projekt.
“Qëllimi i këtyre ngjarjeve ishte të prezantonim disa nga studimet dhe përvojat tona në shkollat që takuam, për t’i inkurajuar ata të vlerësonin potencialin e përvojës dhe njohurive që secili ka në duart e tij çdo ditë, dhe që mund të jetohet në një shkollë dhe kuzhinën e saj”, tha Paola.
“Një synim tjetër ishte ndarja e disa udhëzimeve mbi shëndetin që mund të rigjenerojnë në mënyrë harmonike marrëdhëniet midis traditës, inovacionit, edukimit dhe shëndetit – edhe duke filluar nga ndërtimi i menusë së shkollës”, u shpreh tutje ajo në një intervistë për Osservatorio Balcani e Caucaso.
“Ndër reagimet që na goditën më shumë ishte habia e mësuesve për të parë temën e ushqimit të lidhur me një orë pedagogjike, ku ushqimi trajtohej si një nga gjuhët e përvojës dhe dijes dhe pjesë e identitetit dhe planifikimit të shkollës”.
Aktivistja tha se në Kosovë eksploruan mundësitë e shumta që ofrojnë frutat dhe perimet në aspektin edukativ, transmeton Klankosova.tv.
“Duke parë në sytë e tyre befasinë e eksplorimit të diçkaje të përdorimit shtëpiak dhe të përditshëm – ndonjëherë të konsideruar si të varfër – me sy të ndryshëm dhe duke kuptuar se si një perime e thjeshtë sezonale mund të bëhet një thesar i çmuar mësimi: nga rrënjët, tek ngjyra, tek shija, e lidhur me ngjyrën deri në gjenezën e aromës së një perimeje apo frutash”.
“Ne kemi vënë re gjithashtu se si dëgjimi dhe bërja së bashku rreth kësaj teme ka kontribuar në prishjen e hierarkive të roleve: të gjithë, nga kuzhinierët te mësuesit dhe drejtorët, të vendosur të punojnë për të bashkëpunuar së bashku, për të shkëmbyer njohuri mbi natyrën dhe cilësinë e ushqimit, për të eksperimentuar së bashku”, shtoi aktivistja.
“Kishim një ndjenjë të fortë se falë përfshirjes së kuzhinierëve – të cilët ishin të zënë me ne gjatë ditëve në Kosovë duke përgatitur pjata lokale ose duke iu përgjigjur pyetjeve rreth edukimit të ushqimit në shkollë – kishim ndihmuar në mbështetjen e rolit të tyre edukativ në shkollë”.
“Më pas mësuam nga mësuesit dhe njerëzit e përfshirë në trajnim vlerën që ata rezervojnë për mirëpritjen dhe kujdesin që kanë për shkollat e tyre”.
