Në konferencën për media të mbajtur të dielën, Shala ka thënë se qeveria aktuale duhet të ndalojë menjëherë këtë politikë, që sipas tij është e dëmshme, si dhe të ndërmarrë hapa konkretë për mbrojtjen e konsumatorëve, raporton Periskopi.

“Vendimi i Zyrës së Rregullatorit të Energjisë (ZRRE) për të detyruar bizneset të paraqiten në KEDS për tregun e hapur do të krijojë pasiguri dhe vështirësi të mëdha për ta. Për më tepër, mungesa e konkurrencës reale në tregun e energjisë do të thotë vetëm një gjë: çmime më të larta dhe kushte më të pafavorshme për konsumatorët. Ne nuk do të lejojmë që familjet dhe bizneset kosovare të jenë viktimat e radhës të eksperimenteve të gabuara ekonomike. Partia Demokratike e Kosovës do të përdorë të gjitha mjetet institucionale dhe ligjore për ta kundërshtuar këtë vendim të padrejtë, përfshirë kontestimin e tij në Gjykatën Kushtetuese”, ka thënë Shala.

Shala ka thënë se në pesë vjetët e fundit, qytetarët e Kosovës janë përballur disa herë me shtrenjtimin e çmimit të energjisë elektrike, të cilin kjo qeveri nuk ka bërë asnjë përpjekje për ta ndalur.

“Përkundrazi, duke u fshehur pas terminologjisë së ‘liberalizimit të tregut’, ajo po e shtyn një skenar të rrezikshëm që rëndon mbi familjet dhe ekonominë e vendit”, ka thënë Shala.