Paralajmërohet rrezik: Përdorimi i raketave të avancuara nga Rusia, sinjal për Perëndimin

Presidenti ukrainas, Volodymyr Zelensky, dënoi përdorimin nga ana e Rusisë të një rakete të re, të shpejtë dhe të fuqishme, për të sulmuar qytetin e Dnipros të enjten. Ai e quajti atë një “aventurë bërthamore” dhe një përshkallëzim të fortë të luftës.

Sulmi ka rritur frikën për një fazë të re e të rrezikshme të luftës.

Në një fjalim të tij më vonë, presidenti rus Vladimir Putin konfirmoi përdorimin e një rakete balistike me rreze të mesme veprimi.

Zelensky e cilësoi sulmin si një shenjë të strategjisë më të gjerë të Moskës, duke thënë: “Është e qartë se Putini po përdor Ukrainën si një terren provash për armët që kërcënojnë botën“.

Ndërsa Putin e cilësoi përdorimin e raketës ‘Oreshnik’ me aftësi bërthamore, si një provë rutinë brenda konfliktit.

“Federata ruse testoi një raketë balistike me rreze të mesme, të njohur si Oreshnik, gjatë operacionit të saj në Ukrainë“, tha ai.

Ai ofroi pak detaje teknike rreth sulmit.

Analistët thanë se përdorimi i raketës dhe fakti që Putin e pranoi sulmin, duket se synojnë t’i tregojnë NATO-s dhe Shteteve të Bashkuara aftësitë ushtarake të Rusisë.

Kjo shënoi herën e parë që Rusia pranon hapur përdorimin e një rakete të tillë gjatë luftës.

Ish-ambasadori i Ukrainës në Shtetet e Bashkuara Valeriy Chaly, e cilësoi sulmin si një “fazë të re” të agresionit rus. Duke folur për Zërin e Amerikës ai theksoi se sulmi nuk ishte vetëm një sfidë për Ukrainën, por edhe për aleatët e saj perëndimorë.

“Kjo nuk ka të bëjë vetëm me Ukrainën“, tha Chaly.

“Është një sfidë për sistemin evropian të sigurisë dhe për Shtetet e Bashkuara. Moska po sinjalizon gatishmërinë e saj për t’i përshkallëzuar tensionet në mënyrë dramatike për të ndikuar në Perëndim”.

Ai tha se përgjigja ndaj sulmit “duhet të jetë e qartë, e bashkuar dhe vendimtare – çdo gjë më pak, rrezikon të inkurajojë Rusinë dhe të rrezikojë sigurinë globale”.

Udhëheqësit perëndimorë e dënuan po ashtu sulmin.

Kryeministri britanik, Keir Starmer, e cilësoi atë “të papërgjegjshëm dhe të rrezikshëm”, ndërsa zëdhënësi i Çështjeve të Jashtme të BE-së, Peter Stano, e cilësoi si një “përshkallëzim domethënës” të taktikave të Rusisë.