Një në tre të mbijetuar nga COVID-19 përballet me depresion

Një në tre pacientë të mbijetuar nga infeksione të rënda me COVID-19 kanë zhvilluar çrregullime të ndryshme të shëndetit mendor brenda gjashtë muajve nga shërimi, tregoi një studim i ri.

Studimi, i kryer nga Universiteti i Oksfordit dhe botuar në revistën “The Lancet Psychiatry”, zbuloi se 34% e pacientëve që u shëruan nga COVID-19 përjetuan çrregullime të shëndetit mendor dhe neurologjik.

Studimi, i cili përfshiu 236.379 pacientë, u krye në vazhdën e shqetësimeve në rritje për efektin psikologjik të COVID-19 te të mbijetuarit.

Një studim i mëparshëm nga i njëjti grup kërkimor zbuloi se pacientët janë në një rrezik në rritje të ankthit dhe çrregullimeve të humorit në tre muajt e parë.

”Këto janë të dhëna në botën reale nga një numër i madh i pacientëve. Ato konfirmojnë nivelet e larta të diagnozave psikiatrike pas COVID-19 dhe tregojnë se gjithashtu ndodhin çrregullime serioze që prekin sistemin nervor, të tilla si goditjet në tru dhe demenca. Gjersa kjo e fundit është shumë më e rrallë, ato janë domethënëse, veçanërisht tek ata që kishin gjendje të rëndë të COVID-19”, tha Paul Harrison, autori i studimit.

“Megjithëse rreziqet individuale për shumicën e çrregullimeve janë të vogla, efekti në gjithë popullatën mund të jetë thelbësor për shëndetin dhe sistemet e kujdesit shoqëror për shkak të shkallës së pandemisë”, theksoi Harrison.

Ai tha se sistemeve të kujdesit shëndetësor duhet t’u jepen burime adekuate për të “trajtuar nevojën e parashikuar, si brenda shërbimeve të kujdesit parësor, ashtu dhe atij sekondar”.

Studimi paralajmëroi se diagnozat e demencës dhe goditjes në tru ishin të rralla dhe duhen marrë seriozisht nga shërbimet shëndetësore.