Nga tmerri në horror situata te Man United: CR7 largohet nëse nuk kualifikohet në Champions League

Nga Anglia vjen një detaj i bujshëm për të ardhmen e Cristiano Ronaldos te Manchester United.

Sipas Daily Express, nëse Djajtë e Kuq nuk kualifikohen për edicionin e ardhshëm në Ligën e Kampionëve, CR7 në fund të sezonit mund të kërkojë anulimin e kontratës dhe të kërkojë një skuadër tjetër, për të qenë protagonist në Evropë.

Cristiano Ronaldo e kishte imagjinuar shumë ndryshe rikthimin e tij në Manchester. E në Angli, gjithnjë e më shumë po qarkullojnë zëra këmbëngulës në lidhje me një lamtumirë të mundshme të portugezit që në qershor. Sigurisht që CR7 nuk e ka veshur përsëri fanellën e Djajve të Kuq për të luajtur në Europa League dhe tashmë po shikon përreth.

E gjitha kjo, e përkthyer, do të thotë Champions League e detyrueshme. Ndryshe, sipas Daily Express, në qershor do të bëhet kërkesa për anulim të kontratës me United. Skenari është i mundshëm, duke pasur parasysh dëshirën e ditur të CR7 për të qenë protagonist në kompeticionin më të mirë evropian për klube, dhe do ta vendosë Solskjaer edhe më shumë nën presion për ndeshjet e ardhshme.