Ndërron jetë legjenda e futbollit italian, Schillaci

Salvatore “Toto” Schillac i, sulmuesi që ndezi Botërorin e Italisë 1990 me bëmat e tij dhe i dhuroi të gjithë vendit “Netët Magjike” të paharrueshme, u nda nga jeta sot në moshën 59-vjeçare.

I shtruar prej disa javësh në spitalin Civic në Palermo, kushtet shëndetësore të ish-sulmuesit ishin përkeqësuar orët e fundit. Ai kishte kohë që luftonte me kancerin e zorrës së trashë.

Schillaci, një talent që shpërtheu në Botërorin e tij në shtëpi, do të mbetet përgjithmonë i lidhur me atë verë të paharrueshme.

Me vendosmërinë, shpejtësinë dhe aftësinë e tij për të shënuar, ai u bë simboli i një kombëtareje që arriti në vendin e tretë, duke fituar zemrat e italianëve dhe jo vetëm.

Karriera e tij, e cila filloi në ligat e vogla, e bëri atë të vishte fanellat e Juventus-it dhe Inter-it, por pikërisht me bluzën e kombëtares ai shkroi faqet më të bukura të historisë së tij. Gjashtë gola në shtatë ndeshje në Kupën e Botës 90 dhe titulli i golashënuesit më të mirë janë shifra që flasin vetë dhe që e vendosën atë si një nga sulmuesit më të mëdhenj italianë.

Lajmi për ndarjen e tij tronditi botën e futbollit, e cila vajton një kampion dhe një njeri me zemër të madhe.

Mesazhe të shumta ngushëllimi kanë ardhur nga ish-shokët e skuadrës, trajnerët dhe tifozët, të cilët do ta kujtojnë gjithmonë si heroin e “Netëve Magjike”.

Ai la pas gruan e tij Barbara dhe tre fëmijë Jessica, Mattia dhe Nicole.