Muriqi flet për ndeshjen me Qipron: Nuk është e lehtë, pres nga “Dardanët” që ta mbushin stadiumin

Sulmuesi i Mallorcas dhe i kombëtares së Kosovës, Vedat Muriqi, ka folur pas stërvitjeve që Kosova po i bën para ndeshjeve të Ligës së Kombeve që do të nisin më 2 qershor.

Muriqi tha se është e vështirë t’i luash katër ndeshje për 12-13 ditë dhe akoma më e vështirë pasi është fundi i sezonit dhe të gjithë futbollistët, sipas tij, janë të rënduar edhe fizikisht edhe mentalisht.

“Por shpresojë që të mos kemi ndonjë lëndim dhe si gjithmonë dashtë Zoti që ta kemi forcën tonë kryesore, shpirtin tonë luftarak, e ta zbatojmë atë në fushë dhe t’u tregojmë të gjithëve që në Kosovë nuk është e lehtë që të marrin pikë, kështu që do të luftojmë deri në fund”, është shprehur Muriqi.

Ai ka komentuar ndeshjen hyrëse të Kosovës,  ku për kundërshtar do ta ketë Qipron, për të cilën tha se pasi ka ardhur deri në këtë garë, ajo është një kombëtare e mirë dhe Kosovën e pret një ndeshje jo e lehtë.

Ndërsa, për tifo-grupin e Kosovës, “Dardanët”, Muriqi tha se pret nga ta që ta mbushin stadiumin “Fadil Vokrri” në përkrahje të Kosovës.

“Dardanët gjithnjë kanë qenë fenomenal në çdo ndeshje jashtë e brenda. Pres nga ta dhe e gjithë Kosova që të paktën këto dy ndeshje që i kemi në Kosovë të na përkrahin e të na mbushin stadiumin plot”, është shprehur Muriqi.

Kujtojmë se në Ligën e Kombeve, Kosova gjendet në grupin C2 bashkë me Qipron, Greqinë dhe Irlandën Veriore.

Ndeshjen e parë Kosova do ta luaj si mysafire e Qipros më 2 qershor, për ta pritur Greqinë në “Fadil Vokrri” më 5 qershor dhe Irlandën Veriore më 9 qershor.