Mediat serbe shkruajnë se Serbia ka braktisur takimin për të pagjeturit në Bruksel pas aksionit në Kosovë

Sot në Bruksel ishte planifikuar të mbahet mbledhja e parë e  Komisionit të Përbashkët për Personat e Pagjetur, por pala serbe raportohet se është larguar nga takimi.

Siç raporton Euronews, edicioni në gjuhën serbe, përfaqësuesi nga pala serbe, Petar Petkoviq, e ka lënë takimin.

Petkoviq  raportohet se u largua nga bisedimet për shkak të një aksioni të Policisë së Kosovës ku u mbyllën strukturat paralele në dhjetë komuna të vendit.

Delegacioni serb e ka cilësuar këtë si “dhunë institucionale të paprecedentë”.

Ministri i Punëve të Brendshme, Xhelal Sveçla, ka njoftuar  sot se me aksion të përbashkët të kësaj ministrie me Policinë, Ministrinë e Industrisë dhe të Administrimit të Pushtetit Lokal janë mbyllur komunat paralele serbe në Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skënderaj si dhe posta e zyre tatimore ilegale.