Me kërkesë të të akuzuarit Millorad Gjokoviq, ndërprehet seanca për krime lufte
Me kërkesë të të akuzuarit për krime lufte Millorad Gjokoviq, është ndërprerë seanca e së hënës në Gjykatën Themelore në Prishtinë.
Gjokoviq me mbështetje të mbrojtjes së tij, avokatëve Dejan Vasiq dhe Vasilije Arsiq deklaroi se nuk i ka pranuar të gjitha shkresat e lëndës, andaj nuk mund të vazhdojë me marrjen në pyetje të dëshmitarit Halit Gashi, ashtu siç ishte planifikuar nga seanca e kaluar, raporton “Betimi për Drejtësi“.
Ndërsa, kryetari i trupit gjykues, Valon Kurtaj lidhur me pretendimet e të akuzuarit Gjokoviq, njoftoi palët se nga verifikimi që e ka bërë me administratën e qendrës së paraburgimit, janë njoftuar se të gjitha dokumentet, shkresat të cilat i janë dërguar qëndrës se paraburgimit, i janë dërguar edhe të akuzuarit në qelinë e tij.
Po ashtu, gjykatësi Kurtaj tha se Gjykata do t’i drejtohet kësaj qendre edhe me shkrim që të njoftohet zyrtarisht se a janë dërguar këto dokumente.
Më pas, seanca u ndërpre pasi i akuzuari deklaroi se nuk i ka pranuar këto dokumente dhe se nuk është në gjendje të parashtrojë pyetje për dëshmitarin.
Sipas aktakuzës së përpiluar më 23 qershor 2023, Millorad Gjokoviq akuzohet se në vitet 1998-1999, në fshatin Ozdrim- Komuna e Pejës dhe në fshatrat përreth regjionit të Pejës, si pjesëtar i forcave policore dhe ushtarake serbe, ka aplikuar masat e vrasjes, bastisjes, rrahjes, maltretimit, arrestimit, torturës, trajtimit në mënyre mizore dhe çnjerëzore, mbajtjes në kushte skllavërie, dëbimit dhe deportimit të dhjetëra civilëve shqiptarë. Akuzohet edhe për plaçkitje, djegie dhe shkatërrimin e shtëpive të popullsisë civile të nacionalitetit shqiptar.
Në aktakuzë thuhet se nga ana veriore e fshatit Ozdrim me rrugën regjionale Pejë – Mitrovicë, kishin hyrë ushtria e rregullt dhe në fund nga ana perëndimore e fshatit Ozdrim e cila kufizohet me fshatin Vitormiricë kishin hyrë grupet paramilitare të përzier edhe me pjesëtarë të njësiteve speciale ushtarake, filluan të shtinin me armë në drejtim të popullsisë civile me ç‘rast u vranë gjashtë civilë të nacionalitetit shqiptarë: I.K Sh.K, E.M, R.Sh, Z.Sh dhe M.H, ndërsa tre civilë të cilët u plagosen nga këto të shtëna: A.G, H.G dhe M.G, fillimisht u transportuan për në spitalin e Pejës e më pastaj u ekzekutuan dhe u varrosën në fshatin Lutogllavë, si dhe pesë civil të nacionalitetit shqiptarë: R.K, Z.K, A.K, A.K, A.Sh u vranë gjatë ofensivës, por asnjëherë nuk u gjetën trupat e tyre prandaj ende figurojnë si të zhdukur.
Me këtë, Gjokoviq ngarkohet se në bashkëkryerje ka kryer veprën penale “Krim i luftës kundër popullsisë civile”, e sanksionuar me nenin 142 lidhur me nenin 22 të Ligjit Penal të ish-Republikës Socialiste Federative të Jugosllavisë ( tutje “LP i RSFJ-së”) si ligji në fuqi në kohën e kryerjes së veprës penale.
