Mbrojtja e Krasniqit-Zyrapit: Keni dhënë dëshmi të rreme për ta mbrojtur lëkurën tuaj

Avokatja e Jakup Krasniqit, Venkateswari Alagendra, gjatë kundërpyetjeve të saj i tha dëshmitarit Bislim Zyrapi se ai ka ndryshuar dëshminë e tij dhe se ka dhënë dëshmi të rreme “për ta mbrojtur lëkurën e tij”, pasi sipas saj është dëshmitar i dyshuar.

“Zoti Zyrapi, ju jeni këtu si i dyshuar, jeni këtu së bashku me avokatin tuaj dhe po ju them që dëshmia që e keni dhënë këtu është e rreme dhe dëshminë e keni dhënë për të mbrojtur lëkurën tuaj”, tha Alagendra.

Përpara kësaj, pa praninë e dëshmitarit, Alagendra i tha trupit gjykues se ky dëshmitar ka dhënë pretendime të reja kundër Krasniqit, raporton “Betimi për Drejtësi“.

“Për herë të parë në përgjigje të pyetjeve të gjykatësve, ky dëshmitar ka pretenduar apo ka dhënë fakte të reja kundër zotit Krasniqi. Këto deklarata ose këto fakte nuk i ka dhënë asnjëherë përpara TPNJ-së, apo përpara asnjë instance tjetër”, tha Alagendra.

Avokatja Alagendra theksoi se është qëndrim i tyre se dëshmitari është ndjerë i detyruar që të japë përgjigje që kanë dashur ta dëgjojnë gjykatësit.

“Është qëndrim i yni të nderuar gjykatës që dëshmia e këtij dëshmitari ka zhvilluar, është ndryshuar dhe kur gjykatësit i kanë bërë pyetje, ai është ndjerë që të ndihet i detyruar që të japë përgjigje që kanë dashur të dëgjojnë gjykatësit. Ky është qëndrimi ynë. Unë kam detyrën, të paktën detyrën që ta lejoj atë që t’i përgjigjet pyetjeve”, tha Alagendra.

Pasi u kthye dëshmitari në sallë, qëndrimin e saj Alagendra ia tha edhe Zyrapit, duke shtuar se ai është duke e bërë përgjegjës Krasniqin në disa fusha.

“Zoti Zyrapi, qëndrimi ynë është që e keni ndryshu dëshminë tuaj në disa fusha. Tani thoni që Jakup Krasniqi ka mbikëqyrur sektorin ligjor, një sugjerim që Sokol Dobruna i ka raportuar Jakup Krasniqit, Drejtoria Informative i ka raportuar Jakup Krasniqit dhe sikurse e thashë më herët që Jakup Kransiqi e ka pas kompetencën për të urdhëruar arrestime. Unë po ju them që ju keni zmadhuar, ekzagjeruar qëllimisht rolin dhe kompetencat e Jakup Krasniqit”, tha mbrojtja e Krasniqit.

Ndërsa, Zyrapi mohoi se e ka ekzagjeruar rolin e Krasniqit gjatë dëshmisë së tij gjatë këtyre 12 ditëve.

“Aspak nuk e kam ekzagjeruar rolin e Jakup Kransiqit. E kam spjegu atë sipas pyetjeve që janë ba, sipas përgjegjësive që kanë pas në atë kohë”, tha Zyrapi.

Alagnedra pyeti dëshmitarin gjithashtu se a kishte ushtruar dikush ndikim mbi atë për t’ia hedhur fajin Krasniqit.

“A ka ushtruar ndikim mbi ju dikush për të hedhur fajin mbi Jakup Krasniqin mbi çështjet e ngritura dhe për ta bërë përgjegjës Jakup Krasniqin sa i takon pyetjeve të bëra sa i takon faktit që ju e dini se ai nuk e ka bërë këtë gjë”, tha Alagendra.

Por, një gjë të tillë e mohoi dëshmitari Zyrapi, duke shtuar se dëshmia e tij e tregon realitetin e një sistemi që ka qenë në atë kohë dhe asgjë më tepër.

“Kurrfarë presioni nuk kam pas nga askush. Sipas pyetjeve si ka vepru dhe qysh ka qenë në atë kohë, unë kam shpjegu se cilat kanë qenë përgjegjësitë dhe kush çfarë përgjegjësie ka pas… po e spegoj të njëjtën se kush në cilat përgjegjësie ka pas. Kurrfarë ndryshimi të deklaratës nuk kam ba prej deklaratave që kam dhanë para gjykatave me betimin që kam dhënë të tregoj të vërtetën, atë çka di dhe çka ka qenë e imja që unë di edhe kam pa dhe kam mujt të has dhe asgjë tjetër të veçantë… Jam tu e folë realitetin e një sistemi që ka qenë në atë kohë dhe asgjë më tepër”, tha Zyrapi.

Me kaq përfundoi dëshmia e këtij dëshmitari, kurse seanca tjera nuk do të ketë gjatë kësaj periudhe për shkak të pushimit veror të gjykatës.