Mbi 1.300 raste të dhunës në familje u bartën për trajtim nga 2023-a

Lëvizja FOL ka njoftuar se në vitin 2023 janë regjistruar 2.684 raste të dhunës në familje, prej të cilave 1.393 janë zgjidhur e 1.291 janë bartur për t’u trajtuar sivjet, raporton EO.

Hulumtuesja e Lëvizjes FOL, Albana Hasani, ka thënë se raporti është bazuar në të dhënat e Prokurorisë.

Sipas saj, bartja e lëndëve vazhdon të mbetet sfiduese për organet e sistemit të drejtësisë. Në gjykatat themelore të Republikës së Kosovës në vitin 2023 ishin bartur 1.887 lëndë të dhunës në familje nga vitet paraprake, përkatësisht 70 për qind e lëndëve që kanë që në punë në vitin 2023.

“Ndërsa, në shtatë prokuroritë themelore, në vitin 2023 ishin bartur gjithsej 1.381 lëndë të dhunës në familje nga vitet paraprake  apo 32 për qind të të gjitha lëndëve në punë. Norma mesatare e zgjidhjes së lëndëve të dhunës në familje në të gjitha gjykatat themelore gjatë vitit 2023 ishte 175 për qind, që nënkupton se numri i lëndëve të zgjidhura gjatë kësaj periudhe ishte dukshëm më i lartë se numri i lëndëve të reja të krijuara”, ka thënë Hasani.