Liderët evropianë në një takim me Trumpin për të diskutuar mbi paqen në Ukrainë
Presidenti polak Andrzej Duda do të takohet me Donald Trump sot, presidenti francez Emmanuel Macron do të mbërrijë në SHBA të hënën dhe kryeministri i Mbretërisë së Bashkuar Keir Starmer të enjten.
Të ballafaquar me hezitimin e dukshëm të administratës Trump për të sjellë Ukrainën dhe Evropën në tryezën e bisedimeve për paqen me Rusinë, liderët evropianë kanë riafirmuar mbështetjen e tyre për presidentin Volodymyr Zelensky dhe përkushtimin e tyre ndaj qëllimeve të përbashkëta të sigurisë.
Bëhet e ditur se pas diskutimeve mbi prioritetet e sigurisë në sfondin e luftës trevjeçare në Ukrainë, disa zyrtarë evropianë kanë planifikuar vizita në SHBA për të diskutuar fundin e luftës dhe për të nxitur për një rol evropian në rrugën drejt një marrëveshjeje të mundshme paqeje.
Presidenti polak, duke bërë vizitën e tij të parë tek Trumpi që kur u kthye në Shtëpinë e Bardhë në janar, ka pasur prej kohësh një marrëdhënie pozitive me homologun e tij amerikan, shkruan euronews, përcjell Telegrafi.
Që nga fillimi i agresionit rus, Polonia ka qenë një aleat i vendosur i Ukrainës dhe një qendër qendrore transporti për ndihmën humanitare dhe pajisjet ushtarake që vijnë nga Perëndimi.
Anëtarë të lartë të administratës Trump, përfshirë Sekretarin e Mbrojtjes të SHBA-së, Pete Hegseth, kanë vlerësuar shpenzimet e mbrojtjes dhe angazhimin e Polonisë për sigurinë.
Madje, në vizitën e tij të parë dypalëshe shtetërore javën e kaluar, Hegseth vlerësoi Poloninë si një “aleat model i NATO-s”.
Duda njoftoi se kishte folur me Zelenskyn në telefon për të diskutuar procesin e paqes dhe bisedimet e SHBA-së me Moskën.
“Unë i kam përcjellë atij se ne vazhdimisht besojmë se nuk ka asnjë mënyrë tjetër për të ndaluar gjakderdhjen dhe për të arritur paqen e qëndrueshme në Ukrainë, përveç me mbështetjen e Shteteve të Bashkuara”, tha Duda.
“Për këtë arsye, i sugjerova Zelenskyt që të qëndrojë i përkushtuar ndaj kursit të bashkëpunimit të qetë dhe konstruktiv me presidentin amerikan Donald Trump”, shtoi ai.
Raportohet se njoftimet për këto vizita diplomatike vijnë pasi një delegacion nga SHBA-ja u takua me diplomatë rusë në kryeqytetin saudit Riad për bisedime për përfundimin e luftës.
Dhe asnjë përfaqësues nga Ukraina apo Evropa nuk u ftuan.
Në përgjigje, Macron priti liderët evropianë në një samit urgjent në Paris të hënën për të harmonizuar qëndrimin e tyre të përbashkët për Ukrainën.
Përpara takimit të tij me Trumpin, Macron ka deklaruar se ai synon t’i thotë presidentit amerikan të mos jetë i dobët përballë presidentit rus Vladimir Putin.
“Ajo që do t’i them është se nuk mund të jesh i dobët përballë Putinit. Nuk je ti, nuk është në interesin tënd”, tha Macron.
