LDK: RTK është dorëzuar tërësisht, është shndërruar në vegël të interesit ordiner të pushtetit
Lidhja Demokratike e Kosovës ka reaguar pas sulmeve të RTK-së dhe deputetëve të pushtetit, kundër Periskopit dhe Nacionales.
Në një reagim publik, LDK-ja ka vlerësuar se RTK-ja është dorëzuar tërësisht, dhe se është shndërruar në vegël të interesit ordiner të pushtetit.
Tutje, nga LDK-ja kanë thënë se sulmimi i mediave nga pushteti është shenjë se shpifjet e frikësimet do të shpeshtohen ndaj kundërshtarëve.
Tutje, LDK-ja ka paralajmëruar se do të marrë një hap në Kuvend për këtë temë.
Reagimi i plotë:
Radio Televizioni i Kosovës (RTK) është dorëzuar tërësisht. Mediumi i presupozuar si publik, është shndërruar në vegël të interesit ordiner të pushtetit. RTK jashtë çdo morali e etike godet mediat e Kosovës, iu bën gjygjin publik dhe i dënon me epitetin e tradhëtarit e shërbëtorit të interesave të huaja.
LDK-ja e ka dëshmuar tash e dy vjet – nëpërmjet bojkotit të plotë – se ky medium i thirrur për të përfaqësuar interesin publik dhe promovuar liritë, është shnërruar fatkeqësisht në Bastillen e fjalës së lirë. Në RTK shtypet e vërteta dhe konstruohet propaganda. Reagimet e koordinuara me zyret partiake e pushtetare, ndërsa, të shfaqura qartazi tashmë, dëshmojnë kapjen e thellë të mediumit publik.
Dhe ky është vetëm fillimi sepse kur sulmohen mediat është shenjë se shpifjet, frikësimet do bëhen edhe më të shpeshta e të dukshme edhe ndaj kundërshtarëve të pushtetit. Prandaj reagimi ynë i përbashkët është domosdoshmëri!
LDK-ja do të shfrytëzojë mekanizmat parlamentar për të vënë në dritë kapjen dhe për t’i mbajtur përgjegjës kapësit dhe shërbëtorët e propagandës. Për më tepër bashkë me qytetarin e Kosovës do ta mbrojmë fjalën e lirë dhe interesin publik në këtë vend me çdo çmim!
