Lahi Brahimaj kujton Mujë Krasniqin: Nga gjaku i dëshmorëve lindi liria, ata na frymëzojnë çdo ditë
Kandidati për deputet nga radhët e AAK-së, Lahi Brahimaj ka përkujtuar Mujë Krasniqin në 26 vjetorin e rënies heroike, shkruan Periskopi.
Brahimaj përmes një postimi në llogarinë e tij në Facebook, tha se komandant Kapuçi ishte bashkëthemelues i UÇK-së.
“Pikërisht 20 vjet pas sakrificës së tyre sublime, Kosova themeloi Ushtrinë e saj. Dëshmorët tanë na frymëzojnë çdo ditë – nga gjaku i tyre lindi liria, nga liria u krijua ushtria jonë”, shkroi mes tjerash Brahimaj.
Postimi i plotë:
Flijimi për liri është testament që kalon brez pas brezi, duke u shndërruar në themele të forta për shtetin tonë.
Sot përkujtojmë 26 vjetorin e rënies heroike të Komandant Kapuçit, Mujë Krasniqit, bashkë me 40 bashkëluftëtarë. Bashkëthemelues i UÇK-së, dy herë i plagosur në beteja, luftoi krah për krah me vëllain Aliun dhe shokun e pandashëm Beqir Gashin.
Pikërisht 20 vjet pas sakrificës së tyre sublime, Kosova themeloi Ushtrinë e saj. Dëshmorët tanë na frymëzojnë çdo ditë – nga gjaku i tyre lindi liria, nga liria u krijua ushtria jonë.
