Kurti pritet nga bashkatdhetarët në Kroaci, krah tij edhe ambasadori Martin Berishaj

Kryeministri, Albin Kurti ka mbajtur takim me bashkatdhetarët në Kroaci, ku i pranishëm ishte edhe ambasadori Martin Berishaj.

Para të pranishmëve, Kurti ka thënë se Kroacia është shtet e popull mik, partner e aleat i Kosovës dhe mbarë kombit shqiptar, duke vlerësuar rolin e diasporës në shtetndërtimin e Kosovës, si para dhe pas luftës, para dhe pas shpalljes së pavarësisë.

“Bashkatdhetarët tanë nuk i ftoj më si para 30 viteve që të vijnë në Kosovë e të kontribuojnë duke sakrifikuar, por të fitojnë duke investuar. Po investojnë edhe të tjerët, të gjithë ju që jeni ndërmarrës ne ju garantojmë se në Kosovë nuk e keni vetëm një treg të lirë ku sundon ligji, por e keni dhe një qeveri partnere që ju garanton investimin.” – është shprehur Kurti.

Tutje Kurti ka thënë se për mërgatën kanë mundësuar votimin për zgjedhjet e radhës edhe nëpër ambasada e konsullata.

“Unë jam falënderues e mirënjohës thellësisht e përjetë për këtë kontribut tuajin edhe në luftë edhe në paqe. Ju ftoj të gjithëve për këto festa të fundvitit, me atë çfarë keni mundësi, të vizitoni vendlindjen tuaj. Në Qeverinë e Republikës së Kosovës, në kryeministri, keni politikanë të cilët ju duan fort dhe konsiderojnë që ju kanë shumë borxh. Andaj përpiquni që të bëni dy gjëra: deri në vitin 2030, një vit të ktheheni në vendlindje.

Nuk po them kthehuni tash menjëherë, se e di që këtë e mendoni ju përditë vetë, por gjejeni një vit, e kthehuni në Kosovë, se edhe progresi demokratik, edhe rritja ekonomike, kanë krijuar kushte për jetë të mirë edhe atje. Nuk është më Kosova e kohës kur janë shpërngulur shqiptarët për shkak të persekutimit apo për shkak të varfërisë. Dhe përveç kësaj, mësojeni gjuhën shqipe brezit të ardhshëm sa më mirë.” – ka potencuar ndër të tjera Kurti.