Kurti për aksidentin me viktima në Skenderaj: Shumë shpejt do të kemi pasqyrë më të plotë mbi rastin

Kryeministri i Kosovës, Albin Kurti, iu ka bërë thirrje qytetarëve që të kenë kujdes në komunikacion, në mënyrë që të evitohen aksidentet. Reagimi i Kurtit vjen pas aksidentit në Skenderaj, ku tre persona humbën jetën e pesë të tjerë u lënduan.

Kurti tha se lajmin për këtë aksident e ka marrë me dhimbje të madhe.

Ai ka thënë në Facebook se “shumë shpejt do të kemi një pasqyrë edhe më të plotë mbi rastin”.

“Lajmi për aksidentin e trafikut ku 3 persona humbën jetën në rrugën rajonale Mitrovicë-Pejë na jep dhimbje të madhe. Dua të shpreh ngushëllimet e mia më të sinqerta për këtë ngjarje trishtuese, duke iu drejtuar familjarëve të viktimave e duke shpresuar që të kenë forcën për ta përballuar humbjen e tyre, e njëkohësisht uroj shërimin sa më të lehtë dhe sa më të shpejtë për 5 të lënduarit e këtij aksidenti. Konsideroj se shumë shpejt do të kemi një pasqyrë edhe më të plotë për rastin, ndërkohë që marr shkas për të bërë thirrje për kujdes të përgjithshëm në komunikacionin automobilistik, për të evituar sa më shumë fatkeqësitë”, ka shkruar Kurti.