Kur duhet të përdorni dritat e mjegullës dhe si duket simboli i tyre (Foto)

Shumica e shoferëve po ankohen vazhdimisht për përdorimin e dritave të mjegullës në mënyrë të panevojshme.

Por ndonjëherë, kur jeni duke vozitur në mjegull, mund të jetë e vështirë që të kuptohet nëse ka mjegull mjaftueshëm për të përdorur dritat e mjegullës, transmeton Koha.net. Pra, lind pyetja se kur duhet të përdoren ato – dhe ku janë të vendosura ato, cili është simboli i tyre në instrument-tabelën e veturës suaj?

Dritat e përparme të mjegullës zakonisht gjenden në mbrojtësin e përparmë të veturës. Ato kanë një rreze të ulët të gjerë të cilat i ndihmojnë shoferit që të shohin rrugën më mirë gjatë vozitjes kur ka mjegull.

Pavarësisht se sa janë në gjendje të mirë dritat e mjegullës, ato duhet të përdoren vetëm së bashku me dritat e shkurtra – jo t’i zëvendësojmë – kur pamja në rrugë bie nën 100 metra.

Për t’ju shmangur pengesës ndaj shoferëve të tjerë, dritat e mjegullës duhet të jenë të fikur tërësisht kur pamja në rrugë rritet mbi 100 metra.

Edhe veturat që kanë dritat automatike duhet të kenë kujdes me dritat e mjegullës. Edhe pse dritat e tilla janë të përshtatshme me kushtet atmosferike, si kur është errësi, shi apo mjegull, shoferët duhet të kenë kujdes dhe të jenë në dijeni se me çfarë dritat janë duke lëvizur në komunikacion.

Për ata që mund të kenë harruar, kështu duket simboli i dritave të mjegullës në instrument-tabelën e veturës suaj.